DILI, 07 agostu 2022 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, hateten iha lista pagamentu ne’e hatudu katak iha tinan 2022 ne’e idozu no invalidéz aumenta 7.000-resin.
Notísia Relevante: Faze dahuluk ba pagamentu idozu-invalidéz hahú ho $50
“Tinan-tinan ita-nia idozu no invalidéz sempre aumenta maibé tinan ne’e aumenta barak liu to’o 7.000-resin no fulan ne’e ita bele konklui ona pagamentu tanba hela de’it munisípiu Viqueque no postu adminiatrativu Lolotoe mak seidauk halo pagamentu,” Longuinhos Leite hateten ba Agência Tatoli iha nia kna’ar fatin Caicoli, Dili, kuarta ne’e.
Tuir planu, nia dehan, pagamentu ba idozu no invalidéz ne’e sei konklui iha loron 08-09 setembru tinan ne’e.
Nune’e, nia husu ba autoridade lokál ho idozu no invalidéz sira atu koopera malu, karik iha ema balun seidauk simu tanba ho razaun sai tiha depois de ekipa tama halo pagamentu.
“Husu ba indozu-invalidez ne’ebé ladauk simu osan ne’e tenke relata ona ba xefe suku, nune’e informa mai ami hodi konfirma ho sistema para bele simu tanba bainhira tama ba pagamentu faze daruak entaun ita-boot sira sei lasimu ona no osan sei fila ba konta Estadu,” nia dehan.
Lista idozu no invalidéz ba tinan 2022 liu-liu ba faze dahuluk nian ne’e ho benefisiáriu hamutuk 103.108 ho nia osan millaun $ 62, kompara ho tinan kotuk ne’e ema hamutuk 93.378 ho nia osan $17,172,040.
Dekretu-lei númeru 19/2008, 19 juñu, iha artigu 20 hateten subsídiu apoiu idozu no invalidéz iha tinan 2022 ne’e montante $50 kada fulan, ho nune’e tinan ne’e osan aumenta ba millaun $62.
Jornalista : Osória Marques
Editór : Cancio Ximenes
