DILI, 08 setembru 2022 (TATOLI)—Ministru-Ministru (PM), Taur Matan Ruak, orienta Ministériu Justisa (MJ) liuhosi Diresaun Nasionál Terra no Propriedade (DNTP) sukat uluk rai no atribui sertikadu na’in ba rai molok harii Uma Kbiit Laek (UKL).
“Mai hasoru malu ho Primeiru-Ministru atu fó orientasaun ba Ministériu Justisa liuhosi Diresaun Nasionál Terra no Propriedade ho Kadástru atu halo levantamentu atu sukat rai ba Uma Kbiit Laek ho uma veteranu. Mai konvida Primeiru-Ministru hodi konvoka reuniaun direta ho Diresaun Nasionál Terra no Propriedade ho Kadástru, nune’e Ministériu Justisa rona direta orientasaun hosi Xefe Governu, hodi semana oin Diresaun Kadástru ho Terra servisu hamutuk ho Ministériu Administrasaun Estatál ne’ebé toma konta ba UKL no Ministériu Kombatente Libertasaun Nasionál toma konta ba uma veteranu,” Ministru Justisa, Tiago Amaral Sarmento, relata hafoin hasoru Xefe Governu, iha Rezidénsia PM, Farol.
Notísia relevante: MAE transfere ona osan ba konta bankária suku konstrui UKL 2022
Lista harii UKL iha hotu ona, ne’ebé ekipa sei tun ba sukat rai hodi harii UKL no uma veteranu iha munisípiu 13 no Rejiaun Administrativa Espesiál Oé-cusse-Ambeno (RAEOA).
“Tuir planu, Ministru Justisa hakarak realiza serimónia entrega sertifikadu dahuluk iha RAEOA no Prezidente Repúblika sei atribui sertifikadu na’in ba rai iha loron 28 novembru nu’udar loron proklamasaun independénsia,” nia akresenta.
Governante ne’e dehan, rai ne’ebé durante ne’e harii UKL konsidera hanesan rai Estadu, tanba ne’e maka durante ne’e laiha reklamasaun no problema.
“Ami hanoin projetu harii UKL ne’ebé ezekuta hosi Ministériu Admnistrasaun Estatál (MAE), ami mós garante kedas ho lei ba sira, liuliu ba sukat rai no atribui kedas sertifikadu nain ba rai ba sira. Kalendáriu iha hotu ona ne’ebé semana rua nia laran ekipa sei tun ba terrenu hodi sukat rai bazeia ba lista ami sei sukat hotu, kada munisípiu faze dahuluk sei harii uma-lima,” nia tenik.
Jornalista : Antónia Gusmão
Editora : Julia Chatarina
