DILI, 03 agostu 2022 (TATOLI)–Ministru Administrasaun Estatál (MAE), Miguel de Carvalho Pereira, hateten Sekretariadu Tékniku Programa Nasionál Dezenvolvimentu Suku (PNDS) hato’o proposta ba MAE, nune’e transfere ona osan ba konta bankária suku atu bele hahú halo konstrusaun Uma Kbiit Laek (UKL) tinan 2022.
Notísia Relevante: Tinan 2022: Governu sei konstrui Uma Kbiit Laek 4.000
“PNDS hato’o proposta katak haruka osan ba suku atu nune’e hahú halo konstrusaun UKL 2022. Entaun, ami halo transferénsia osan ba suku sira-nia konta bankária,” Miguel de Carvalho Pereira hateten ba jornalista sira, iha Palásiu Governu, kuarta ne’e.
Preparasaun konstrusaun UKL 2022 ne’e mós ekipa iha terrenu konklui hotu ona no hein atu implementa de’it.
“Agora ita hahú halo konstrusaun ba UKL 2022 ba benefisiariu 4.000. Tuir kalendáriu ne’ebé iha katak prosesu konstrusaun ba UKL ne’e durante fulan tolu,” nia hateten.
Iha 2022, Governu liuhosi Ministériu Finansa (MF) aloka ona orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu, tanba redusaun 75% hosi orsamentu ne’ebé aloka iha tinan ida-ne’e.
“Deputadu sira propoin tan osan hamutuk $63,600.000 hodi MAE liuhosi PNDS bele halo konstrusaun ba Uma Kbiit Laek iha 2022 hodi aumenta uma 10 kada suku, nune’e Governu prontu atu implementa programa ida-ne’e,” nia dehan.
Notísia Relevante: UKL 2022 iha faze mobiliza materiál konstrusaun ba benefisiáriu sira
Jornalista : Osória Marques
Editór : Cancio Ximenes
