DILI, 08 setembru 2022 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE) servisu hamutuk ho empreza Mossmont Nurseries hosi Austrália fó teste fíziku no entrevista ba joven timor-oan 63 atu bá serbisu iha Austrália.
Atividade teste fíziku no entrevista ne’e rasik hala’o iha Sentru Nasionál Empregu Formasaun Profisionál Tibar, hahú iha loron 06 setembru to’o 08 setembru.
“Traballadór na’in-63 ne’ebé hetan oportunidade teste fíziku no entrevista ne’e naran iha ona sistema work ready pool SEFOPE ni’an, nune’e maka empregadór Mossmont Nurseries halo selesaun hodi mai fó teste direta,” Koordenadora Mobilizasaun Traballadór ba Serbisu iha Austrália, Cezarina Guterres, hateten liuhosi nota ne’ebé Agência Tatoli asesu, kinta ne’e.
Notísia relevante: Grupu auto-empregu 67 hetan apoiu fundu hosi SEFOPE
Nune’e, ekipa DNEE fasilita de’it prosesu teste, maibé atu foti valór hodi deside liu no la liu empregadór mak determina bazeia ba rezultadu teste fíziku no resposta hosi intervista ne’ebé kada pesoál ko’alia direta ho reprezentante empregadór.
“Ha’u agradese ba empreza Mossmont Nurseries ne’ebé disponibiliza tempu hodi mai to’o iha Timor-Leste rekruta joven timor-oan sira atu ba serbisu iha empreza ne’e, nune’e bele redús númeru dezempregu iha país,” nia akresenta.
Na’in ba empreza Mossmont Nurseries, Jonathan hateten, empreza ne’e hakarak mai rekruta joven timor-oan serbisu tanba durante tinan-neen ona fó serbisu ba timor-oan 15 no hatudu prestasaun serbisu di’ak hodi kontribui ba sustentabilidade ekonomia empreza.
“Iha prosesu teste ne’e, ha’u sei foti traballadór timor-oan na’in 20 to’o 30 iha tinan ida-ne’e. Ha’u iha planu karik traballadór timor-oan ne’ebé daudaun atu bá serbisu iha hau-nia empreza mak hatudu komportamentu serbisu di’ak no iha esperansa ba futuru númeru rekrutamentu joven timor-oan sira sei aumenta tan,” nia dehan.
Jornalista : Arminda Fonseca
Editora : Julia Chatarina
