EKONOMIA, HEADLINE

Grupu auto-empregu 67 hetan apoiu fundu hosi SEFOPE

Grupu auto-empregu 67 hetan apoiu fundu hosi SEFOPE

Reprezentante grupu auto-empregu 67 hasai foto hamutuk ho Sekretáriu Estadu Formasaun Profisionál no Empregu, Alarico do Rosário, iha Salaun Caicoli, kuarta (10/08). Imajen Tatoli/Arminda Fonseca

DILI, 10 agostu 2022 (TATOLI)–Sekretaria Estadu Formasaun Profisionál no Empregu (SEFOPE) kuarta ne’e, asina kontratu ho grupu auto-empregu hamutuk 67, ne’ebé antes ne’e submete proposta no hetan aprovasaun.

Sekretáriu Estadu Formasaun Profisionál no Empregu, Alarico de Rosário, husu ba grupu sira atu ezekuta fundu tuir planu ne’ebé aprezenta iha proposta tanba apoiu ne’ebé fó bazeia ba papél SEFOPE, ne’ebé hakarak hadi’a ema-nia moris hodi koñese saida mak serbisu.

“Atividade ne’ebé ohin ita halo tanba SEFOPE iha orsamentu ba apoiu auto-empregu, entaun ita-nia grupu sira ne’ebé hatama proposta atu hetan apoiu ne’e hamutuk 110 resin, maibé ema na’in-67 mak pasa ho apoiu fundu $334.328,70,” Sekretáriu Estadu Alarico, informa iha Salaun Caicoli.

Notísia relevante: SEFOPE sei haruka tán traballdór 49 ba serbisu Austrália

Nia dehan, atividade ne’ebé grupu halo mak hanesan iha área ortikultura, hakiak ikan, ofisina, rental no agrikultór.

“Ita-nia grupu sira, antes ne’e hetan ona formasaun iha sentru formasaun, nune’e sira iha ona esperénsia hodi hala’o atividade maibé ladun la’o, entaun husu apoiu iha Governu hodi negósiu bele la’o, tanba ne’e ha’u husu imi tenke ezekuta osan ne’e ho di’ak,” nia akresenta.

Orsamentu ne’ebé SEFOPE apoiu ba grupu 67 ne’e ho montante hahú $3.000 to’o $8.000, bazeia ba proposta hosi grupu sira, ne’ebé grupu sira ne’e mai hosi munisípiu hotu inklui Rejiaun Administrativa Espesiál Oé-cusse Ambeno (RAEOA).

“Ita sei fó sansaun ba grupu sira bainhira la ezekuta osan tuir planu no ita sei foti ba grupu seluk,” nia hateten.

Iha fatin hanesan, grupu benefisiáriu ba ofisina hosi munisípiu Covalima, Firmino Gusmão, hateten, sira-nia parte hatama proposta ba SEFOPE tanba grupu eziste tinan barak ona maibé tanba menus finansiamentu maka sira husu apoiu Governu nune’e bele reativa atividade sira.

“Ami husu fundu ba SEFOPE hamutuk $4.000 no grupu ne’e kompostu hosi ami na’in-lima. Ami garante katak ba oin ami sei utiliza osan ne’e ho di’ak,” nia otimista.

Benefisiáriu hosi munisípiu Ainaro, Domingos Xavier, hateten, sira-nia grupu kompostu hosi ema na’in-lima, ho atividade harii rental.

“SEFOPE loke oportunidade ba auto-epregu nian ami kompete no liu. Agora osan ne’ebé ami hetan hosi SEFOPE ne’e hamutuk $5.000, ami senti kontente, tanba osan ne’ebé ami hetan bele ajuda tan ami sosa materiál ne’ebé ami presiza,” nia hateten.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!