Uma-kain 70 iha aldeia Babunak Viqueque falta bee-moos
VIQUEQUE, 08 setembru 2022 (TATOLI)—Uma-kain 70 resin iha aldeia Babunak, suku Uma-kiik, postu administrativu Viqueque vila, munisípiu Viqueque enfrenta kondisaun falta bee-moos.
“Aldeia ne’e enfrenta falta bee-moos hodi konsumu loron-loron, kuaze tinan barak ona seidauk asesu no kada loron komunidade tenke la’o dook hodi kuru bee-moos,” Xefe aldeia Babunak, Julio Sarmento, hateten ba Agência Tatoli, iha aldeia Babunak, kinta ne’e.
Notísia relevante: Uma-kain 200 resin iha suku macadique seidauk asesu eletrisidade no bee-moos
Aleinde ne’e, bainhira komunidade hakarak kuda modo ruma labele tanba laiha bee. Nune’e mós foin lalais programa kintál uma hun hosi Organizasaun Naun Governamentál (ONG) internasionál ADRA tama aldeia Babunak hodi orienta komunidade kuda modo besik uma hun labele realiza tanba falta bee.
“ADRA sira lori programa ida mai aldeia, nune’e ha’u husu ajuda kee bee posu ida tanba bee posu ne’e iha ona, maibé bee seidauk dada ba komunidade nia fatin. Tanba ne’e daudaun ami-nia komunidade nafatin la’o dook foin kuru bee,” nia haktuir.
Autoridade lokál ne’e husu ba parte kompetente sira atu tau-matan ba komunidade Babunak ne’ebé oras-ne’e seidauk asesu ba bee-moos.
“ADRA kee posu kiik ba ami. Se bele parte relevante sira apoiu materiál ruma ba ami hodi ami konstrui tanki bee ba komunidade,” nia hato’o.
Jornalista : Vitorino Lopes da Costa
Editora : Julia Chatarina
