BOBONARO, 09 setembru 2022 (TATOLI) – Asosiasaun Futeból Bobonaro (AFB) lideradu Domingos Gouveia Moniz, sei realiza kompetisaun jogu futébol hamutuk tolu iha époka 2022.
Prezidente Asosiasaun Futeból Bobonaro, Domingos Gouveia Moniz, informa, tuir loloos hafoin jogu sub-22 iha fulan-juñu liubá sentru juveníl koordena ho asosiasaun kontinua kedas realiza jogu sub-16, maibé la konsege implementa tanba Federasaun Futeból Timor- Leste (FFTL) atraza halo transferénsia orsamentu.
Maibé daudaun asosiasaun mós hetan ona kontaktu hosi sentru juveníl katak sira sei realiza jogu sub-16, tanba ne’e mak sei iha konfuzasaun ida entre asosiasaun ho juveníl, katak sé mak atu realiza uluk jogu.
Notísia relevante: AFB planeia loke kompetisaun futeból sub-19
“Ami tempu badak sei halo reuniaun estrutura asosiasaun, hodi diskute atu realiza jogu tolu, primeiru sub-livre, sub-19 hodi hatene bainhira mak atu realiza joga, hafoin ida mak ita hanoin mós ba jogu femenina ne’ebé sei akontese iha ftinan ida-ne’e,” nia informa ba Jornalista Tatoli, iha Kámara Eklidistika Dioseze Maliana tuan, sesta ne’e.
Gouveia hatutan, data tentativa atu realiza jogu sub-livre ne’e iha setembru, maibé tanba daudaun ne’e arbritajen sira utiliza atributu hotu ba dirije hela jogu ida kuartél Unidade Patrúlamentu Frontéira (UPF) Nú Badak, suku Batugade, postu administrativu Balibo, nune’e sei konvoka enkontru ho estrutura asosiasaun atubele determina loron abertura jogu ne’e.
Prezidente ne’e subliña, jogu sub-livre ne’e mós seidauk garantia atu realiza duni tanba asosiasaun sei husu autorizasaun hosi FFTL.
Bainhira federasaun la konkorda mak sei realiza uluk jogu sub-19 no kontinua kedas ba jogu femenina,ne’ebé sei envolve klubu sira-ne’ebé durante ne’e rejista ona iha asosiasaun inklui klubu sira hosi postu administrativu Atabae, Balibo, Cailaco no Bobonaro.
Tanba daudaun ne’e iha jogadór sub-19 barak mak remata ona eskola nível sekundáriu ba kontinua estudu nível universidade iha kapitál Dili nune’e klubu sira menus jogadór.
“Ha’u hanesan Prezidente Asosiasaun fó hanoin ba ita-nia alin jogadór sira hotu atu kontinua treinu tátika no fíziku atubele kompete iha eventu ne’e hatudu prestasaun jogu di’ak, nune’e bele sai jogadór ne’ebé di’ak ba munisípiu Bobonaro no ita-nia nasaun,” nia dehan.
Prezidente ne’e dehan, depende ba planu ne’ebé aprezenta ba FFTL mak foin aprova, maibé kuandu atrazu halo transferénsia orsamentu entaun asosiasaun hola inisiativa tau fundu rasik hafoin federasaun reimbolsa.
Entretantu kada fulan FFTL aloka $1.500 kompostu hosi 40% hodi responde ba nesesidade asosiasaun, liuliu atu ativu estrutura no 60% sosa atributu grace rute nian.
Durante ne’e AFB hakarak realiza jogu iha estádiu Malibaka, Yamato, Maliana ne’ebé lokaliza iha Soso, maibé pedidu ne’ebé submete ba nasionál nunka hetan autorizasaun hosi kompañia ne’ebé halo manutensaun ba kampu.
“Ami iha problema hela kona-bá kampu, maibé ami nafatin hato’o karta ba federasaun atu submete ba SEJD atu ami bele joga iha estádiu ne’e, kuandu labele ami nafatin utiliza kampu futeból iha sentru merkadu Maliana,” nia hateten.
Daudaun ne’e AFB iha ona árbitru na’in-37. Hosi númeru ne’e, na’in-10 ho sertfikadu lisensa (C) kompostu hosi mane ualu (8) no feto rua (2) no restante maioria ho serfikadu bázika lisensa (D), maibé árbitru hirak-ne’e na’in-ualu de’it mak ativu hela no barak mak la ativu ona tanba okupadu ho serbisu seluk.
Notísia relevante: AFB identifika terinadór 22 partisipa formasaun hosi FFTL
Jornalista: Sérgio da Cruz
Editór: Evaristo Soares Martins
