BOBONAR0, 03 abríl 2022 (TATOLI) – Asosiasaun Futeból Bobonaro (AFB) lideradu Domingos Gouveia Moniz, planeia loke kompetisaun futeból sub-19 mane époka dahuluk tinan 2022 nian.
Prezidente AFB, Domingos Gouveia Moniz, informa iha époka 2022 ne’e asosiasaun sei loke kompetisaun futeból taxa asosiasaun futeból Bobonaro haat mak hanesan, jogu grase rute juvenil jogu sub-19 mane, jogu sub-23 hodi komemora loron konsulta popúlar 30 agostu no taka ho jogu sub-livre hodi komemora loron istóriku 28 novembru.
“Ami sei implementa kompetisaun uluk mak sub-19 ba mane, sei hahú abertura depois eleisaun segundu volta, la sala iha loron 25 abríl agora, oras ne’e daudaun ami fahe ona informasaun ba klubu sira liuhosi mídia sosiál facebook atu halo ona preparasaun hodi mai kompete,” nia informa ba Agência Tatoli, iha nia rezidénsia Holsa, Maliana, segunda ne’e.
Prezidente AFB husu ba klubu futeból sira iha postu administrativu sira-ne’ebé durante ne’e eziste iha munisípiu Bobonaro atu hahú prepara jogadór sira-nia fíziku no tátika nune’e bele kompete iha eventu desportiva ne’e ho kualidade.
“Ami sei fó-sai ona konvite ba klube sira hotu-hotu atu mai rejistu ne’e atu ami bele hatene loloos klubu hira mak atu mai partispa iha taxa asosiasaun futeból sub-19 iha tinan ne’e,” nia katak.
Domingos hatutan eventu ne’e apoia hosi Federasaun Futeból Timor-Leste (FFTL), maibé to’o agora parte asosiasaun seidauk hatene klara kona-ba ninia montante orsamentu.
Daudaun ne’e AFB iha ona árbitru kuaze na’in-37. Hosi númeru ne’e na’in-10 ho sertfikadu lisensa (C) kompostu hosi mane ualu, feto rua no restante maioria ho serfikadu bázika lisensa (D), maibe árbitru hirak-ne’e na’in-16 mak ativu hela no barak mak la ativu ona tanba okupadu ho serbisu seluk.
Jornalista : Sérgio da Cruz
Editór : Evaristo Soares Martins
