iklan

DILI, HEADLINE, POLÍTIKA

Lú Olo-Alkatiri re-eleitu sai Prezidente-Sekretáriu Jerál FRETILIN períodu 2022-2027

Lú Olo-Alkatiri re-eleitu sai Prezidente-Sekretáriu Jerál FRETILIN períodu 2022-2027

Prezidente partidu FRETELIN, Francisco Guterres, ho Sekretariu Jerál akompaña hosi segundu jerasaun partidu FRETILIN, Lere Anan Timur, iha kongresu nasionál dalimak iha Sentru Konvensaun Dili (CCD), Dili, kinta (8 setembru 2022). Imajen Tatoli/António Daciparu.

DILI, 09 setembru 2022 (TATOLI)-Iha kongresu nasionál dalimak Partidu Frente Revolsionáriu Timor-Leste Indepedente (FRETELIN) ne’ebé hala’o loron dahuluk, kinta ne’e, lori Francisco Guterres ‘Lú Olo’ no Marí Alkatiri re-eleitu sai Prezidente no Sekretáriu Jerál Partidu FRETILIN ba períodu tinan 2022-2027.

Notísia Relevante: Kongresu da-V FRETILIN sesaun daruak taka ba públiku

Adjuntu Sekretáriu Jerál Fretilin, Flávio Maria da Silva, hateten iha prosesu kongresu proponente sira aprezenta pakote rua hanesan kandidatu Prezidente Francisco Guterres Lú Olo no Sekretáriu Jerál, Mari Alkatiri, no pakote seluk mak kandidatu Prezidente José Agostinho Sequeira Somotxo no Sekretáriu Jerál, Rui Maria de Araújo.

“Hafoin simu proposta hosi proponente kandidatu ba meza kongresu no komisaun verifikasaun podér verifika rekezitu sira pakote ida Somotxo no Rui Maria de Araújo la prenxe rekezitu tuir rejimentu kongresu hanesan númeru delegadu apoiu la to’o 20%, depois munisípiu balun la to’o delegadu 10 tanba ne’e pakote ne’e elimina tiha mosu pakote ida de’it,” Flávio hateten ba jornalista sira depois kontajen fó sai rezultadu iha CCD.

Enkuantu, rezultadu votasaun ba kandidatu pakote uniku ho prosesu votasaun sekretu ho votu a-favór 764, kontra 106, nulu 47, no delegadu sira-ne’ebé iha ho totál 925 maibé vota de’it 917.

Entertantu, prosesu eleisaun no kontajen ne’e ramata iha tuku 01h25 madrugada no serimonia ba pose sei hala’o iha loron sesta (09/08) ohin.

Hanesan antes ne’e iha katak, Jenerál Reformadu Lere Anan Timur sai hanesan pakote alternativu maibé iha momentu kongresu atu aprezentasaun pakote ba meza Lere retira hosi pakote ne’e, ho ida ne’e Somotxo avansa kedas ho Rui Maria de Araújo.

Hafoin ensera kongresu Jornalista Tatoli tenta atu konfirma ho Lere razaun saida mak retira maibé la konsege tanba depois ensera kongresu Lere iha minutu balun fila ona uma deskansa tanba iha ona oras madrugada.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!