iklan

INTERNASIONÁL, HEADLINE

MD: Asinatura SoFA hadi’a liután kooperasaun entre Timor-Leste no Austrália

MD: Asinatura SoFA hadi’a liután kooperasaun entre Timor-Leste no Austrália

Prezidente Repúblika, José Ramos Horta, bainhira hasoru malu ho Primeiru-Ministru, Anthony Albanes, iha nia rezidénsia, Canberra. Imajen Tatoli/Rafy Belo.

CANBERRA, 08 setembru 2022 (TATOLI)—Ministru Defeza, Filomeno Paixão de Jesus, informa asinatura Estatutu forsa (SoFA, sigla inglés) entre Timor-Leste no Austrália ne’e atu hadi’a liután kooperasaun rai rua nian iha área defeza.

Notísia Relevante: Timor-Leste ho Austrália asina akordu kooperasaun defeza

“Asinatura SoFA pozitivu tebes tanba durante ne’e sira (Australianu) iha ne’ebá (TL). Ita presiza hatudu ita-nia seriedade. Ita presiza iha buat ida atu regula sira-nia hahalok,” Ministru Filomeno Paixão hateten ba Tatoli, iha Embaixada TL, iha Canberra, kinta ne’e.

Iha parte seluk, Governante Oitavu Governu Konstitusionál ne’e, ba jornalista sira informa katak nia parte selebra akordu SoFA ho nia omólogu Australianu, Richard Marles tanba hetan delegasaun poder hosi Primeiru-Ministru, Taur Matan Ruak.

“Akordu SoFA ne’e ita hala’o serbisu kedas dezde Prezidente ‘Lú Olo’ nia tempu,” nia informa.

Ezekutivu ne’e haktuir, Prezidente Repúblika anteriór husu ba nia kona-ba akordu kuadru SoFA nian hodi bele haree no ‘regula’ forsa sira-ne’ebé tama no sai iha TL, hanesan halo parseria, kooperasaun, ezersísiu hamutuk, apoiu umanitária no seluktán.

“Ita haree ba akordu ne’e di’ak. Maibé, la’ós katak ho asina akordu ne’e forsa Austrália sira tama sai arbiru iha Timór,” nia dehan.

Ministru Defeza, Filomeno Paixão esplika, Lei defeza nasionál TL hateten bainhira TL husu apoiu militár ba rai-li’ur tenke iha konkordánsia hosi autoridade timoroan sira hotu.

Paixão hatutan, bainhira TL iha ‘presaun’ estranjeira, alende ho forsa no povu iha, bele mós husu apoiu ka hetan apoiu hosi país amigu ka nasaun vizinu sira, reziste.

“Akordu SoFA ne’e mak atu regula; sira-nia hahalok halo nusa. Sira-nia komportamentu halo nusa. Sira submete ba ita-nia lei ka lae. Se halo sala buat ruma, sé mak tesi-lia. Tribunál Timór ka ida ne’ebé. Kuandu iha ona SoFA, kuandu sira halo sala buat ruma tenke tesi iha territóriu Timór,” nia dehan.

Enkuantu, Asinatura akordu SoFA loke dalan ba kooperasaun oioin iha domíniu defeza atu dezenvolve no moderniza FALINTIL-Forsa defeza Timor-Leste (F-FDTL) inklui sei esplora área sira tuir nesesidade forsa sira-nian iha área formasaun, treinu, ezersísiu konjuntu no área sira seluktán.

Iha fatin hanesan, Prezidente repúblika, José Ramos Horta, hateten, Timor-Leste nia interrese nasionál mak hametin relasaun ho Indonézia no Austrália tanba vizinu.

Tanba ne’e, tuir Xefe Estadu, hala’o ona vizita Estadu ba Indonézia no agora iha Austrália, hahú 06 to’o 11 setembru, akompana hosi membru Governu no delegasaun sira hasoru ona entidade oioin hanesan Governante sira, membru parlamentár inklui entidade relevante sira.

“Ba oin sei haree, aumenta liután ita-nia relasaun. Ne’e, jeografia mak hateten ba ita. Laiha rai rua iha mundu bele importante liubá Timor-Leste nia interrese nasionál,” nia salienta.

Relasaun di’ak Timor-Leste no Austrália, Prezidente repúblika relembra, Austrália apoiu iha prosesu ‘krusiál’ Timor-Leste nian, iha 1999.

“Uluk ’75’, iha Guerra sívil, timoroan lubuk ida mai Austrália. Agora, grupu foun, la’ós ona refujiadu, organizadu ho programa Governu nian mai serbisu tulun ekonomia Austrália,” PR Horta haktuir.

Jornalista : Rafy Belo

Editór      : Cancio Ximenes

iklan
iklan

Leave a Reply

iklan
error: Content is protected !!