DILI, 09 setembru 2022 (TATOLI)—Prezidente Konsellu Administrasaun Portuáriu Timor-Leste (APORTIL), Lamartinho de Oliveira, hateten, tinan ne’e servisu merkadoria kona-ba importasaun no exportasaun sei muda ba portu foun Tibar maibé atividade administrasaun kontinua la’o.
“Maski portu muda ona ba Tibar, maibé ita kontinua nafatin servisu kontrola ró pasaseiru sira ne’ebé tama mai ne’e hodi hetan reseita fó kofre Estadu,” Lamartinho de Oliveira, hateten ba Agência Tatoli, iha ninia knaar fatin, APORTIL, Colmera, sesta ne’e.
Portu Tibar sei jere hosi empreza internasionál ne’ebé parseria ho setór privadu tanba Governu no empreza asina ona akordu durante tinan-30 ba jestaun merkadoria portu Tibar.
“Maski atividade portu ne’e rasik muda ba Tibar no ami la toma konta ba portu Tibar ona, maibé ami kontinua nafatin atividade bazeia ba artigu 15 no 16 dekretu-lei númeru 3/2003, ne’ebé prevee funsionamentu administrasaun APORTIL,” nia akresenta.
Notísia relevante: Konstrusaun Portu Tibar la’o hela no sei inaugura iha tinan ne’e
Bainhira servisu portu muda ona Tibar, servisu sira hanesan Autoridade Aduaneira (AA) Alfándega, Karantinan mós sei muda hotu.
“APORTIL iha traballadór hamutuk 97 ne’ebé servisu ba exportasaun no Importasaun, bele muda mós ami kontinua nafatin servisu hanesan baibain,” nia tenik.
Maibé kona-ba traballadór sira ne’ebé servisu hamutuk ho ajénsia sira durante ne’e iha APORTIL, ba oin bainhira servisu deskarregamentu portu muda ba Tibar, ne’e filafali ba ajénsia sira mak hatene oinsá traballadór sira-nia servisu.
Biban ne’e, Prezidente Konsellu Administrasaun ne’e husu ba Kámara Komérsiu no Indústria Timor-Leste (CCI-TL, sigla portugés) ne’ebé nu’udar mahon ba atividade komérsiu nian hodi haree mós ba situasaun hirak ne’e.
“Bainhira portu muda ona ba Tibar, oinsá ho traballadór sira ne’e nia moris tanba ita hotu hatene portu Tibar servisu buat hotu uza sistema ne’ebé kompletu,” nia dehan.
Jornalista : Arminda Fonseca
Editora : Julia Chatarina
