DILI, 10 setembru 2022 (TATOLI)-–FALINTIL-Forsa Defeza Timor-Leste (F-FDTL) no Polísia Nasionál Timor-Leste, hahú lansa operasaun konjunta hodi implementa diretiva númeru 2/2022 kona-ba regra empeñamentu ba trankuilidade seguransa interna ne’ebé maka instituisaun rua estabelese ona liuhosi asina akordu, nune’e bele garantia pás no estabilidade nasionál.
Hosi diretiva ne’e, autoriza komandu rua servisu hamutuk atu halo operasaun konjunta hodi foti medida rigorozu atua situasaun seguransa iha territóriu nasionál, liuliu iha kapitál Dili, ne’ebé ikusmai la hakmatek kauza hosi konfrontu grupu balun ne’ebé sempre provoka malu hodi halo perturbasaun públika, nune’e halo públiku sente la seguru iha tempu kalan.
Operasaun konjunta iha Dili hahú lansa iha sesta (09/09) iha tuku 22:00 kalan no ramata iha tuku 02:30 madrugda, ne’ebé lideradu hosi Segundu Komandante Superintendente João Sancho no partisipa mós hosi Komandante Operasaun Superintendente Xefe Pedro Belo no Segundu Komandante Unidade Espesiál Polísia (UEP) Damião dos Santos.
Notísia relevante: Operasaun konjunta F-FDTL-PNTL la tolera kriminozu ne’ebé kria instabilidade sosiál
Iha intervensaun, Segundu Komandante Superintendente João Sancho, hateten, operasaun ne’e komandu rua, PNTL ne’ebé hetan apoiu hosi F-FDTL la’o halo patrullamentu atu observa situasaun jerál iha kapitál Dili tuir tarefa operasaun komandu rua ne’ebé fahe ona membru ida-idak.
“Iha operasaun ne’e, ita la’o ho karreta maibé kuandu ita la’o iha terrenu maka haree momentu ruma ne’ebé nesesáriu ba ita atu pasa revista, la problema ita bele halo,” Superintendente João Sancho, hateten liuhosi nia intervensaun iha ámbitu lansamentu operasaun konjunta entre komandu F-FDTL no PNTL, ne’ebé hala’o iha Palásiu Governu.
Iha biban ne’e, nia parte agradese ba mídia nasionál sira tanba bele kolabora ho parte autoridade seguransa hodi transmite atividade ne’e.
Iha fatin hanesan, Xefe Operasaun Komandu PNTL Munisipiu Dili, Inspetór Xefe Delfin da Silva, hateten, operasaun konjunta ne’e membru instituisaun rua sei la’o tuir área sira ne’ebé determina ona hanesan Mascarinhas, Caicoli, Taibessi, STM Becora, Terminál Becora, Has-laran, Bidau Masaur, Metiaut, Cristo Rei, Praia dos Coqueiros, Bebonuk, Rotunda Nicolau Lobato, Tasi-tolu, Kampung Baru, Bairro Pité no finaliza iha Palásiu Governu.
Operasaun konjunta ne’e PNTL Dili hetan apoia hosi Departamentu Tránzitu Munisipiu Dili, forsa rezerva, Unidade Espesiál Polísia (UEP) Batallaun Orden Públiku (BOP), Unidade Polísia Marrítima (UPM), membru polísia balun hosi Kuartel Jerál PNTL no hetan apoiu hosi Komandu F-FDTL Unidade Polísia Militár.
Enkuantu, durante operasaun konjunta ne’ebé parte forsa rua halo durante oras haat nia laran, hodi halo pasa revista ba iha bairru sira iha Dili laran hosi Cristo Rei tama to’o Tasi-tolu, nota katak la’o di’ak, kotroladu no hakmatek, laiha perturbasaun no konfrontu ruma nune’e halo membru F-FDTL no polísia la halo detensaun ba ema ruma.
Iha sábadu (10/09), parte komandu PNTL Dili ne’ebé hetan apoiu hosi Unidade UEP, UPM no F-FDTL hosi Unidade Polísia Militár rasik sei kontinua halo operasaun konjunta hodi halo patrullamentu tama-sai bairru, liuliu iha área hirak iha Dili laran ne’ebé konsidera hanesan área risku ba konflitu, nune’e atu joven sira iha bairru kontribui ba pás no estabilidade atu ema hotu sente livre iha tempu loron no kalan.
Jornalista : Natalino Costa
Editora : Julia Chatarina
