Apoia TL iha situasaun emerjénsia, PR vizita NCCTRC iha Darwin
DARWIN, 11 setembru 2022 (TATOLI) – Sentru nasionál ba kuidadu krítiku no trauma (NCCTRC, sigla inglés), Darwin, sentru ne’ebé fó-ona asisténsia oinoin ba Timor-Leste iha situasaun emerjénsia sira, tanba ne’e, iha fin-de-semana ne’e, Xefe Estadu, José Ramos Horta, ho ekipa delegasaun halo vizita ofisiál ba sentru ne’e.
Prezidente repúblika, José Ramos Horta hateten, Timor-Leste nu’udar viziñu ida- ne’ebé besik liu Austrália no iha relasaun forte iha istória.
“Austrália dezempeña papél ida-ne’ebé krítiku husi tinan 1999 hodi destaka tropa sira, inklui médiku sira, matenek-na’in sira, liuliu iha formasaun ami-nia forsa defeza. Ida-ne’e sei kontinua,” Ramos Horta hateten ba jornalista hafoin vizita ofisiál, iha Sñsentru nasionál ba kuidadu krítiku no trauma, Darwin, Austrália.
Lider timoroan ne’e rekoñese katak Timor-Leste, liuliu nia parte pesoál iha esperiénsia pesoál ho Sentru nasionál ba kuidadu krítiku no trauma, Darwin, liuhusi lideransa, Diretór Profesór, Len Notaras, profisionál NCCTRC sira, inklui Royal Darwin hospitál.
“Vizita fatin ida-ne’e, ha’u seidauk halo antes ne’e”.
Xefe Estadu mós konsidera, NCCTRC hala’o nia atividade hodi fó-asisténsia ‘umanitária’, esforsu liuhusi kompromisu, solidariedade ho povu sira iha rejiaun.
“Tanba ne’e, iha ne’e sira ba fatin hotu iha Ázia, hodi fó-asisténsia ba povu sira iha dalan oioin hanesan inundasaun, asidente boot sira no seluktan, tantu iha Indonézia, Timor-Leste, Pakistaun, iha Áfrika”.
Prezidente José Ramos Horta mós apresia prestasaun servisu NCCTRC inkluzivamente Diretór Profesór, Len Notaras, inklui nia funsionáriu sira.
“Ne’e inisiativa boot ida. Ida-ne’e parte ida husi Austrália hatuur ida-ne’e, liuhusi lideransa ida, intelektuál, akadémiku ida, la’ós boot de’it iha nia antesidénsia maibé mós iha fuan boot”.
Iha oportunidade ne’e, Diretór NCCTRC, Len Notaras partilla informasaun relevante kona-ba prezensa Xefe Estadu Timor-Leste iha instituisaun ne’ebé nia lidera.
“NCCTRC hamriik kle’ur ona hamutuk ho Timor-Leste. Povu timoroan sira, nune’e fahe ideia ba malu, fahe oportunidade ba malu, nu’udar relasaun ida besik malu,” Ezekutivu NCCTRC subliña.
Entretantu, prestasaun servisu no asisténsia ne’ebé NCCTRC halo ona hodi apoiu Timor-Leste mak partilla ideia hamutuk ho Sentru integradu jestau kriza (CIGC, sigla portugés) no mós haruka enfeirmeira, fisioterapia no terapia okupasionál ba ICU (Intensiive care unit) hodi fornese kuida krítiku no apoia ba pasiente iha fasilidade izolamentu COVID-19. iha ámbitu pandemia Covid-19.
Nune’e mós, ajuda dezenvolve, koordena no apoiu formasaun hodi estabelese sistema saúde Timor-Leste nian, oferese formasaun ba pesoál saúde sira kona ‘Esensiál kuidadu krítiku, no rehabilitasaun ba dezastre no emerjénsia’, kolabora Charles Darwin University (CDU) hodi oferese bolsa estudu ba timoroan sira, oferese asisténsia iha ámbitu ‘Tour de Timor’ inklui atividade relevante NCCTRC nian.
Notísia relevante:Prezidente Repúblika konsidera jestaun HNGV problema
Jornalista: Rafy Belo
Editór: Evaristo Soares Martins
