Territóriu norte Austrália hakarak hamosu akordu tempu naruk fasilita timoroan

DARWIN, 11 setembru 2022 (TATOLI) –  Xefe Governu territóriu norte Austrália, Natasha Fyles, hateten, Governu territóriu norte hakarak hamosu akordu ba tempu naruk ida, atu nune’e bele fasilita traballadór timoroan sira bele serbisu iha Austrália.

“Tradisionalmente, ho visa singulár ne’ebé mak ita-boot sira iha no tama-mai serbisu iha Austrália, ita-boot sira labele fila ba ita-boot nia nasaun. Ami hakarak ko’alia ho Governu. Federál atubele iha Visa entrada multipla atu nune’e ema bele iha tempu naton ba no mai, husi Timór mai territóriu norte no fila fali,” Natasha Fyles hateten ba jornalista sira bainhira akompaña prezidente repúblika, José Ramos Horta, iha vizita ofisiál ba Ospitál Royal Darwin, Austrália, sábadu ne’e.

Nune’e, ba oin, tuir ezekutivu ne’e katak sei esplora ho empregadór sira balun hodi buka oportunidade liuliu iha agrikultura no turizmu.

Xefe Governu territóriu norte Austrália, Natasha Fyles, akresenta, territóriu norte Austrália iha relasaun besik ho Timor-Leste no timoroan sira durante tempu naruk nia laran. Tanba ne’e, hakarak ajuda traballadór timoroan sira hodi reforsa sira-nia kualifikasaun.

Natasha mós rekoñese katak traballadór timoroan sira ne’ebé agora iha Austrália, sira serbisu maka’as loos.

“Ha’u hadomi sira. Sira serbisu maka’as. Ha’u koñese sira balun ku’u ai-fuan. Ida ne’e definitivamente iha afeitu ne’ebé forte ba timoroan sira,” nia rekoñese.

Husu kona-ba númeru traballadór timoroan na’in hira mak presiza, ezekutivu ne’e la informa totál kuantidade maibé garante apoiu Timor-Leste nu’udar relasaun besik ho Governu territóriu Norte Autrália.

“Ha’u hanoin ida ne’e hanesan oportunidade ida atu esplora, hanesan prepara treinamentu no apoiu. Empregradór sira balun iha rekomendasaun, ha’u hanoin sei iha detallu balun atu hala’o serbisu tanba Timór iha relasaun besik iha tempu naruk nia laran,” nia hateten.

Notísia relevante:Austrália kompromete apoia fundu millaun A$20 ba Timor-Leste

Jornalista: Rafy Belo

Editór: Evaristo Soares Martins