iklan

INTERNASIONÁL, DILI, HEADLINE

Austrália kompromete apoia fundu millaun A$20 ba Timor-Leste

Austrália kompromete apoia fundu millaun A$20 ba Timor-Leste

Ministra Negosiu Estranjeiru Australia, Penny Wong ho Ministra Negosiu Estranjeiru Adaljiza Xavier R. Magno iha komferensia imprensa ho jornalista sira, iha MNEC, kinta (1/09). Imajen Tatoli/António Daciparu

DILI, 01 setembru 2022 (TATOLI)– Governu Austrália iha kompromisu apoia fundu millaun A$20, ne’ebé ekivalente ho $13, ba Governu Timor-Leste hodi finansia programa  reziliensia komunitáriu no rekuperasaun ekonómiku.

Kompromisu apoia fundu millaun A$20 ne’e hato’o hosi Ministra Negosiu Estranjeiru no Kooperasaun Austrália Penny Wong, hafoin sorumutu ho nia omológa Ministra Negósiu Estranjeiru no Kooperasaun (MNEK), Adalzija Albertina Xavier Reis Magno.

Ministra Negosiu Estranjeiru Australia, Penny Wong. Imajen Tatoli/António Daciparu

“Austrália promete fó millaun A$20 ba Timor-Leste hodi enkaixa iha Orsamentu Jerál Estadu Timor – Leste nian.  Hodi Governu Timor-Leste bele utiliza ba selu labarik ne’ebé hetan bolsa da mãe jerasaun foun, inan isin rua, hala’o Programa Dezenvolvimentu Suku (PNDS) no bele utiliza ba formasaun traballadór Timoroan sira antes ba servisu iha Austrália,” katak Ministra Penny Wong, liuhosi konferénsia imprensa ne’ebé halao iha edifísiu MNEK-Dili, kinta ne’e.

Ministra Australianu ne’e dehan ko’alia ona ho Prezidente Repúblika, José Ramos Horta kona-ba importánsia apoia Austrália atu kapasita jerasaun foun hodi kompete merkadu traballu liuliu kapasita traballadór timoroan sira atu ba servisu iha Austrália.

“Timor-Leste no Austrália hanesan nasaun viziñu, nune’e tenke hametin amizade no kooperasaun iha área oin-oin,” nia afirma.

Austrália nia apoiu orsamentu direta (𝐷𝑖𝑟𝑒𝑐𝑡 𝐵𝑢𝑑𝑔𝑒𝑡 𝑆𝑢𝑝𝑝𝑜𝑟𝑡) adisionál millaun A$20 (aproximadamente dólar amerikanu millaun $13) ba tinan 2023 hodi apoia ba programa reziliensia komunitáriu no rekuperasaun ekonómiku.

Orsamentu adisionál millaun A$20 ne’e sei uza hodi finansia Programa Reziliénsia Komunitáriu no Rekuperasaun Ekonómiku liuhusi Programa Bolsa da Mãe Jerasaun Foun (BdMJF) ho montante dólar austrálianu millaun A$10.

Programa asisténsia sosiál ne’e nia objetivu mak atu redús má-nutrisaun no pobreza iha Timor-Leste ho nia alvu prinsipál mak inan isin-rua no bebé foin moris to’o tinan rua.

Alende ne’e, millaun A$7 sei aloka ba Programa Nasionál Dezenvolvimentu Suku (PNDS) hodi uza ba harii infraestrutura bázika iha Suku sira hanesan klínika saúde, estrada, ponte, bee moos, dranajen no irrgasaun.

Nune’e mós orsamentu millaun A$1,3 sei aloka ba Programa Mobilidade Laborál liuhusi hasa’e númeru traballadór Timoroan sira ne’ebé sei ba servisu iha Austrália no apoiu kontínua ba traballadór sira ne’ebé mak fila-fali ona mai Timor-Leste.

Entretantu, Iha 2020, Timor-Leste no Austrália asina ona Akordu Apoiu Orsamentu Direta Faze Dahuluk ho montante dólar australianu millaun A$7 ba Programa PNDS.

Iha fulan-juñu 2021, Ministru Finansas, Rui Augusto Gomes no reprezentante Embaixada Austrália asina mós Akordu Apoiu Orsamentu Direta Faze Daruak ho montante dólar australianu millaun 20 (aproximadamente dólar amerikanu millaun $15,5 ne’ebé aloka ba Programa PNDS millaun $10,5 no BdMJF millaun $5).

Orsamentu ne’e uza hodi apoia Programa Reziliénsia Komunitária no Rekuperasaun Ekonómiku durante pandemia Covid-19.

To’o ohin loron, Suku 396 mak benefisia ona husi apoia ne’e ho totál projetu 411, ne’ebé kompostu husi projetu bee moos no saneamentu hamutuk 230, projetu harii estrada no ponte 106 no projetu agrikultura 25.

Iha Austrália nia tinan fiskál 2022-2023, orsamentu asisténsia dezenvolvimentu husi Austrália ba Timor-Leste hamutuk dólar australianu millaun 105,7 (aproximadamente Dolar Amerikanu millaun $73). Montante ne’e seidauk inklui Apoiu Orsamentu Direta adisionál millaun $20 ba tinan 2023.

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!