Autoridade husu MS kria postu saúde iha suku Liaruka Viqueque
VIQUEQUE, 12 setembru 2022 (TATOLI)–Autoridade suku Liaruka, postu Ossu, munisípiu Viqueque, husu Ministériu Saúde (MS) atu kria postu saúde iha suku Liaruka hodi komunidade sira bele asesu.
“Ha’u husu ba Ministériu Saúde atu kria netik postu saúde ruma iha suku Liaruka hodi komunidade bele asesu, tanba bainhira sira hetan moras tenki la’o dook maka foin bele asesu fasilidade saúde sira,” Xefe suku Liaruka, Francisco Soares, hateten iha suku Liaruka, segunda ne’e.
Komunidade suku Liaruka ninia preokupasaun ne’ebé presiza hetan atensaun maka fasilidade saúde hodi sira bele asesu besik ba sira.
“Bainhira iha moras derrepente ruma kona komunidade, liu-liu inan isin-rua atu partu, sira tenke halai bá postu saúde Uaimori no sentru saúde Venilale ne’ebé ho distánsia dook tebes, maibé komunidade ho pasiénsia tenke halai hodi hetan asisténsia médika,” nia akresenta.
Notísia relevante: Postu saúde Macadique falta rekursu umanu implementa programa saúde na família
Aleinde ne’e, programa saúde iha família tama iha suku Liaruka kada fulan dala-ida de’it hodi doutór sira halo konsulta, tanba ne’e autoridade lokál husu parte kompetente sira atu kria kondisaun.
Iha fatin hanesan, xefe aldeia Kaiwa, Andre Soares, hateten, dala barak komunidade atu halo tratamentu saúde tenke la’o dook hafoin hetan tratamentu.
“Ami preokupa tebes ho fasilidade saúde. Komunidade iha aldeia Kaiwa bainhira atu konsulta tenke bá Uaimori no Venilale hafoin hetan konsulta. Ho ida-ne’e, ami husu se bele tau netik postu saúde ruma atu ami bele asesu,” nia tenik.
Tuir dadus sensu populasaun tinan 2015, suku Liaruka iha área jeográfika kilómetru kuadradu 67,01, ho ninia aldeia hamutuk lima hanesan Baha-Neo, Cai-Ua, Liakuda, Liaruka, no Selele, ho totál uma-kain 241 no totál abitante 1.008.
Jornalista : Vitorino Lopes da Costa
Editora : Julia Chatarina
