iklan

EKONOMIA, HEADLINE

BTL, E.P no empreza rua asina kontratu ba konstrusaun sistema bee-moos

BTL, E.P no empreza rua asina kontratu ba konstrusaun sistema bee-moos

Prezidente Konsellu Administrasaun BTL, E.P, Carlos Peloi dos Reis, asina nota kontratu ho Diretór empreza Malaca Unipessoal Lda, Gregório de Sousa, kona-ba projetu konstrusaun sistema bee-mos, iha salaun BTL, E.P, Caicoli, segunda (12/09). Imajen Tatoli/Francisco Sony

DILI, 12 setembru 2022 (TATOLI)-Bee Timor-Leste, Empreza Públika (BTL, E.P), segunda ne’e, asina kontratu ho empreza Always Construction Lda no Malaca Unipessoal Lda, atu dada bee-moos ba komunidade iha postu administrativu Maubisse Vila no munisípiu Ataúro.

“Ha’u husu ba empreza rua, projetu ne’ebé ita-boot sira hetan tenke serbisu ho di’ak hodi garante kualidade bee-moos ba ita-nia komunidade bele asesu ba tempu naruk, tanba ita-boot sira mak ami-nia liman ain serbisu iha terrenu, nune’e BTL kontinua promove ba komunidade seluk ne’ebé seidauk bele hetan hotu,” Prezidente Konsellu Administrasaun, Carlos Peloi, hateten iha edifísiu sentrál BTL, E.P Caicoli.

Notísia relevante: BTL sei kanaliza bee-moos ba komunidade Caisido

Projetu ba prosesu melloramentu sistema bee-moos ne’ebé toma-konta hosi empreza Always Construction Lda ho kustu $1.089,37 no ba empreza Malaca Unipessoal Lda ho kustu projetu $501.945 no benefísiu ba kada uma-kain $1.476,31.

Diretór empreza Always Construction Lda, Lay Kian Tjin, hateten, sira-nia parte sei serbisu ho másimu nune’e bele ramata tuir kontratu ne’ebé iha.

“Kontratu ne’ebé ami asina, ba serbisu durante fulan-neen, hahú setembru 2022 to’o ramata, nune’e ami prontu serbisu hamutuk ho autoridade lokál hodi komunidade bele asesu bee-moos,” nia tenik.

Melloramentu sistema bee-moos iha munisípiu Ataúro ne’e ba faze dahuluk iha kapitál Ataúro sei benefisia uma-kain 792 ho populasaun 4.750.

Iha fatin hanesan, Diretór empreza Malaca Unipessoal Lda, Gregório Francisco Gama, hateten, projetu bee ba Maubisse sei benefisia uma-kain 340 ho populasaun 2.040, ne’ebé sei ezekuta projetu ho kustu $862.781 no benefísiu ba uma-kain $1.089.

“Ami promete sei ezekuta ho di’ak nune’e fó rezultadu di’ak ba ita-nia komunidade Maubisse Vila,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!