iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

Ema na’in-259 iha Maliana sai benefisiáriu ba UKL + B

Ema na’in-259 iha Maliana sai benefisiáriu ba UKL + B

Adiministradór postu administrativu Maliana, munisípiu Bobonaro, Tomás Laco-Loe. Imajen Tatoli/Sérgio da Cruz.

BOBONARO, 12 setembru 2022 (TATOLI)-Adiministradór postu administrativu Maliana, munisípiu Bobonaro, Tomás Laco-Loe, hateten ekipa verifidór identifika ema na’in-259 ih postu administrativu Maliana mak sai benefisiáriu ba programa Uma Kbiit Laek (UKL) + Katégoria (B) tinan 2022.

Nia haktuir, prosesu verifikasaun ne’e transparante tanba envolve hosi ekipa tékniku Programa Nasionál Dezenvolvimentu Suku (PNDS), Ekipa Jestaun Suku (EJS), funsionáriu administrasaun postu Maliana, xefe suku no xefe aldeia sira.

Notísia relevante: CCM Bobonaro hili Balibo-Maliana implementa UKL+

“Ita-nia benefisiáriu UKL + B iha postu administrativu Maliana iha 259 mai hosi suku hotu no kada suku hetan benefísiariu 37,” nia informa ba Jornalista sira, iha edifísiu SEFOPE, Soso, Maliana, segunda ne’e.

Tomas akresenta, daudaun ne’e ekipa tékniku PNDS munisípiu Bobonaro, hahú sukat uma largura nune’e Governu bele distribui materiál.

Enkuantu rekizitu importante mak tuir kondisaun uma ba kategoria B hanesan uma fatuk, uma meia parede, kategoria sosiál mak komunidade ne’ebé iha ona uma permanente ka semí-permanente no estatutu rai tenke privadu ka eransa, laiha konflitu ka disputa, iha dokumentu legál hosi Ministériu Justisa.

UKL plus implementa bazea ba dekretu-lei númeru 25/2022, 19 maiu, kona-ba programa UKL plus ho objetivu konstribui ba hamenus kiak iha Timor-Leste, garante moris di’ak, iha uma ne’ebé seguru ba ema hotu nia moris no garante ema hotu iha oportunidade atu horik iha uma ne’ebé dignu.

“Ha’u sente programa estatál ninian atu tulun ita-nia komunidade ne’ebé ke kalen ferujen no balun ku’ak ona ne’e, atu sira bele hela iha uma ne’ebé kondisaun di’ak oituan,” nia agradese.

Uma kbiit laek hanesan programa Governu konstituisional da VIII liuhosi Programa Nasionál Dezenvolvimentu Suku (PNDS) hodi korresponde ho Planu Estratéjiku Dezenvolvimentu Nasionál (PEDN) 2011-2030), ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no fó-moris di’ak, hodi redús pobreza no garante ema hotu hetan oportunidade hetan rai no uma hodi bele tulun nia hala’o moris ho dignu no seguru.

Notísia Relevante:MAE sei distribui zinku ba benefisiáriu UKL+ tipu B iha Baucau

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!