iklan

NASIONÁL, EDUKASAUN, DILI, HEADLINE

MEJD garante projetu komunitáriu konstrusaun infraestrutura eskola sei inaugura iha dezembru

MEJD garante projetu komunitáriu konstrusaun infraestrutura eskola sei inaugura iha dezembru

Prosesu reabilitasaun Eskola EBF Hum-Boe, munisípiu Ermera, liuhosi projetu komunitáriu. Imajen/Espesiál

DILI, 12 setembru 2022 (TATOLI)–Diretór Nasionál dezenvolvimentu Parque Eskolár (DNDPE), Agostinho Soares, relata, daudaun projetu komunitáriu konstrusaun infraestrutura eskola 202 la’o hela iha territóriu nasionál no sei inaugura iha dezembru tinan ne’e.

“Ita-nia estimasaun antes, tinan ne’e ramata iha dezembru kuaze 80% hosi projetu komunitáriu 202 ne’ebé la’o hela iha eskola sira iha territóriu nasionál, ne’e bele hetan ona inaugurasaun,” Diretór hateten ba Agência Tatoli, iha ninia knaar fatin, Ministériu Edukasaun Juventude no Desportu (MEJD), Vila Verde, segunda ne’e.

Daudaun ne’e iha ona projetu komunitáriu hamutuk 189 maka aprezenta ona ba Ajénsia Dezenvolvimentu Nasionál (ADN) inklui pedidu verifikasaun ba progresu fíziku, maibé kestaun ida maka limitasaun ekipa.

“ADN presiza tempu atu halo verifikasaun ba projetu 189 ne’e, másimu semana rua atu konklui,” nia akresenta.

Notísia relevante: Projetu komunitáriu iha eskola EBF tolu foin atinje 10%

Tuir nia, bainhira projetu 189 ne’e konklui ona ba futuru, prosesu pagamentu bele realiza ona atu nune’e estimasaun hosi Diresaun Nasionál Dezenvolvimentu Parke Eskolár (DNDPE) nia antes tinan ne’e bele ramata ona no halo inaugurasaun.

“Ita halo projetu ho grupu komunitáriu sira ne’e fulan-neen de’it, hahú hosi fevereiru to’o agostu, loloos ita konklui ona maibé tanba atrazu ne’ebé iha intervensaun balun entre ADN ho MEJD kona-ba matadalan sira ne’e mak implika kuaze fulan-rua resin projetu la la’o inklui mós mudansa oráriu ba prosesu reabilitasaun projetu komunitáriu iha eskola balun labele realiza tanba mudansa klimátika,” nia akresenta.

Iha projetu balun hanesan estrada foin bele asesu iha jullu tanba razaun sira ne’e maka MEJD liuhosi DNDPE tenke extende tan kontratu atu nune’e sira bele konklui projetu sira.

“Diresaun ninia esperansa katak dezembru ikus tenke konklui ona, se seidauk bele handover parese hela de’it 5% hanesan ne’e sira tenke konklui, ne’ebé bele dehan kuaze 80% resin maka antes tinan ne’e ramata bele konklui ona,” nia otimista.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!