iklan

BOBONARO, HEADLINE, INKLUZAUN SOSIÁL, LEI, MUNISÍPIU, SEGURANSA

MI sensibliza lei protesaun sivíl iha Maliana

MI sensibliza lei protesaun sivíl iha Maliana

Ministériu Interior (MI) no Sekretaria Estadu Protesaun Sivíl (SEPS), segunda ne’e sensibliza lei protesaun sivíl, númeru 12/2020 iha postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 12 setembru 2022 (TATOLI)-Ministériu Interiór (MI) no Sekretaria Estadu Protesaun Sivíl (SEPS), segunda ne’e sensibiliza ba lei protesaun sivíl, númeru 12/2020 ho pontu importante tolu ba ofisiál polísia Suku (OPS) no lideransa komunitária sira iha postu administrativu Maliana, munisípiu Bobonaro.

Komandante Operasaun Autoridade Protesaun Sivíl munisípiu Bobonaro, Inspetór José Lelo-Bere, esplika, atividade sosializasaun ne’e iha loron 07 agostu ne’e hala’o ona iha postu administrativu Bobonaro, kontinua fali iha postu Cailaco iha loron 09 agostu iha postu administrativu Balibo.

Notísia relevante: PN Aprova Ona Proposta-Lei Protesaun Sívil

“Ohin loron ami sosializa iha Maliana,kona-bá lei protesaun sivíl, númeru 12/2020 kompostu hosi ninia pontu tolu ne’ebé mak mai importante liu maka prevensaun depois proteje no terseiru mak sokoru,” nia informa ba jornalista sira, iha Salaun SEFOPE Maliana, segunda ne’e.

Purtantu iha loron 29 fulan-jullu liubá, Sekretaria Estadu Protesaun Sivíl fó pose ba komandante Operasaun autoridade protesaun sivíl munisípiu 14 ne’ebé asume hotu hosi membru Polísia Nasionál Timor-Leste (PNTL), hahú hosi diviza ofisiál, inspetór to’o inspetór-xefe sira atu lidera liña komandu bainhira komunidade sira hetan dezastre naturál no inséndiu.

Tamba ne’e, Inspetór José Lelo-Bere, hateten bainhira akontese dezastre ruma hanesan inundasaun no inséndiu dahuluk autoridade suku no OPS sira presiza halo kontaktu liuhosi telefónika.

“Ha’u hanesan komandante autoridade protesaun sivíl munisípiu Bobonaro orienta kedas ami-nia ekipa sira ba terrenu lori ho apoiu emerjénsia kedas,” nia hateten.

Administradór postu administrativu Maliana, Tomás Lacu-Loe, agradese ba autoridade protesaun sivíl tanba atividade sira hanesan ne’e iha baze importante tebes.

“Ida-ne’e hanesan matadalan ida, atu nune’e ita-nia autoridade komunitária sira bele hatene di’ak liután, depois liuhosi fahe informasaun ida-ne’e lideransa sira bele fahe tutan ba komunidade sira oinsá hatene risku dezastre naturál iha ita-nia rai,” nia hateten.

Notísia relevante: Protesaun Sivíl Bobonaro preparadu projete komunidade hosi risku dezastre naturál

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!