DILI, 12 setembru 2022 (TATOLI)—Adjuntu Exportasaun Alfándega, Marcos de Oliveira, hateten, Timor-Leste konsege halo ona exportasaun ba produtu kafé ho kuantidade tonelada 92.000, hahú janeiru to’o agostu 2022.
“Produtu sira ne’e haruka ba nasaun sira hanesan Austrália, Áfrika Súl, Alemaña, Belgica, Kánada, Xina, Holanda, Indonézia, Japaun, Portugál no Estadu Unidu Amérika. Ita-nia produtu kafé ne’ebé halo exporsaun ne’e mak hanesan kafé arábika no robusta,” Marcos de Oliveira informa ba Agência Tatoli, iha ninia knaar fatin, Portu Dili, segunda ne’e.
Notísia relevante: Grupu agrikultór Pante Makasar prepara kuda kafé rihun 23-resin iha époka 2022
Aleinde ne’e, Timor-Leste exporta produtu seluk hanesan mina-nuu tonelada 18, kami tonelada neen, no ai-teka tonelada haat.
“Produtu lokál sira ne’e exporta hosi empreza sira hanesan Acelda, Kooperativa Kafé Timor (CCT, sigla portugés), Timor Global no seluk tan,” nia akresenta.
Produtu lokál sira ne’ebé halo exportaun ne’e tuir tempu, bainhira halo kolleta maibé kuantidade menus ne’e la halo exportasaun.
“Bainhira sira halo exportasaun semana ida ka fulan ida halo dala-ida tanba empreza sira sei sosa tau hamutuk lai mak foin haruka dala-ida,” nia dehan.
Timor-Leste mós haruka besi-tua no alumíniu ba Indonézia, Malázia no Singapura no nasaun seluk tan.
Jornalista : Arminda Fonseca
Editora : Julia Chatarina
