iklan

EDUKASAUN, HEADLINE

MEJD foin akredita eskola internasionál rua iha Dili

MEJD foin akredita eskola internasionál rua iha Dili

Diretór Jerál Administrasaun no Finansa hosi MEJD, Antoninho Pires. Imajen Tatoli/Egas Cristóvão

DILI, 13 setembru 2022 (TATOLI)–Governu liuhosi Ministériu Edukasaun Juventude no Desportu (MEJD) foin akredita eskola internasionál iha Dili hanesan Eskola Portuguesa Ruy Cinatti Dili no Dili International School, tanba eskola rua ne’e prienxe ona rekizitu.

”Ita –nia Governu fó ona akreditasaun ba eskola rua ne’e,” Diretór Jerál Administrasaun no Finansa MEJD, Antoninho Pires, hateten iha ninia knaar fatin, Vila Verde, tersa ne’e.

Tuir Diretór, eskola internasionál hitu seluk ne’ebé eziste iha Timor-Leste ne’e sei iha hela prosesu lisensiamentu no akreditasaun tanba kuaze seidauk prienxe kritériu ne’ebé ministériu fó maibé nafatin fó tempu atu sira atubele kompleta.

Notísia relevante: PR Horta konsidera eskola portugeza Ruy Cinatti kualidade aas

Diretór esplika, eskola internasionál ida iha buat rua maka tenke kumpre, hanesan iha kurríkulu própriu ne’ebé hetan ona sertifikasaun internasionál no tenke hanorin matéria obrigatóriu ne’ebé tuir nesesidade iha Timór.

“Tanba eskola maka internasionál maibé labarik sira eskola iha ne’ebá maioria timor-oan de’it. Entaun sira tenke hanoin mós matéria saida maka Timór presiza hanesan lian, tanba ita opta lian ofisiál rua hanesan tetun no portugés,” nia akresenta.

Aleinde ne’e, matéria sira ne’ebé sai obrigatóriu mak hanesan istória nu’udar kultura no identidade Timór nian tenke hanorin mós iha eskola internasionál inklui edukasaun sívika.

“Ida-ne’e maka rekizitu ne’ebé eskola internasionál sira tenke kumpre. Bainhira sira seidauk bele kumpre rekezitu hirak ne’e maka sei la hetan akreditasaun,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!