DILI, 13 setembru 2022 (TATOLI)–Primeiru-Ministru (PM), Taur Matan Ruak, hato’o felisitasaun ba Banku Sentrál Timor-Leste (BCTL, sigla portugés), ne’ebé selebra aniversáriu ba da-11.
“Ita selebra anivesáriu ba da–11 estabelisimentu Banku Sentrál Timor-Leste. Ami felisita BCTL, liuliu Governadór Abraão de Vasconselhos, dirijente hotu no traballadór sira iha nia instituisaun reguladora sistema bankária,” Xefe Governu hato’o felisitasaun ne’e liuhosi diskursu iha ámbitu aniversáriu BCTL da-11, ne’ebé hala’o iha salaun OKA, iha Surikmas, tersa me’e.
Notísia relevante: BCTL hili Kaebauk sai vensedór dahuluk ba Central Bank Award 2022
Xefe Governu dehan, desde kriasaun BCTL sai hanesan aliadu Governu hodi kria sistema finanseiru modernu, abranjente no reziliente.
“BCTL mós sai hanesan responsável ba pagamentu saláriu funsionáriu administrasaun públika, subsídiu ba populasaun no kontratuál ba entidade relevante sira,” PM Taur akresenta.
Xefe Ezekutivu konsidera banku ne’e hanesan mos autoridade monetáriu nasionál, ne’ebé iha responsabilidade ba sirlulasaun moeda.
Alende ne’e, BCTL iha mós iha responsabilidade ba sirkulasaun moeda sentavu ne’ebé iha atu evita krize inflasionária.
“Servisu finanseiru sira ne’ebé oferese hosi BCTL ba Estadu ho modernalizasaun substansiál, liuliu ho intrudusaun sistema ASYCUDA World, hodi permite Ministériu Finansa liuhosi Diresaun Jerál Tezouru hodi halo orden pagametu ho forma eletrónika no aumenta efisiénsia rapidez iha jestaun finanseira públika,” nia rekoñese.
Jornalista : Antónia Gusmão
Editora : Julia Chatarina
