iklan

BOBONARO, MUNISÍPIU, SEGURANSA

PNTL Bobonaro entrega suspeitu ne’ebé ameasa F-FDTL no PNTL ba Ministériu Públiku

PNTL Bobonaro entrega suspeitu ne’ebé ameasa F-FDTL no PNTL ba Ministériu Públiku

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 13 setembru 2022 (TATOLI)–Komandu Polísia Nasionál Timor-Leste (PNTL) munisípiu Bobonaro, tersa ne’e entrega ona suspeitu DR ne’ebé lansa ameasa hasoru instituisaun F-FDTL no PNTL ba Ministériu Públiku (MP).

PNTL Munisípiu Bobonaro entrega suspeitu DR ne’e ba Ministériu Públiku (MP) tanba lansa ameasa hasoru instituisaun FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) iha mídia sosiál facebook ho liafuan provokativu.

“Ne’e mak hamriik hotu ne’e hanesan instituisaun F-FDTL ho PNTL ne’e la halo ida, ami hú moris de’it, imi kaer na’in-haat mosu fali rihun ba rihun,” liafuan provokasaun ne’e suspeitu DR lansa iha iha loron 12 fulan-setembru ne’e.

Notísia relevante: PNTL Bobonaro koloka efetivu 145 asegura graduasaun kandidatu PSHT

Ho aktu ne’e, Komandante Jerál PNTL, Komisáriu Faustino da Costa, orienta kedas komandu PNTL munisípiu Bobonaro, atu buka-tuir. Nune’e, Komandante PNTL munisípiu Bobonaro, Superintendente Antonhinho Mauluta, hatún orden ba polísia komunitária hanesan mós estrutura Sub-Komisaun Reguladora Arte Marsiál (KRAM) atu koordena ho lideransa organizasaun arte-marsiál balun iha munisípiu Bobonaro.

Nune’e iha momentu ne’ebá, estrutura arte-marsiál balun iha Bobonaro ba foti kedas suspeitu ne’e iha nia rezidénsia bairru ospitál tuan, aldeia Bilicou, suku Holsa, postu administrativu Maliana.

Purtantu, iha loron 12 fulan-setembru ne’e estrutura arte-marsiál Bobonaro ne’e entrega kedas suspeitu ba autoridade seguransa hodi kumpre oras 24 iha sela detensaun komandu munisípiu Bobonaro hodi presta deklarasaun ba aktu ne’ebé nia komete.

Enkuantu iha loron 13 fulan-setembru ne’e, tuku 08:00 dadeersan, Servisu Investigasaun Kriminál munisípiu Bobonaro kontinua prosesa hodi identifika no submete kedas ba Ministeriú Públiku iha tuku 14:00.

“Ohin loron ita entrega ona Ministériu Públiku (MP) no aplika ona TIR (Termu Identidade Rezidénsia), despois mak hein prosesu seluk ne’ebé sei kontinua,” Komandante PNTL munisípiu Bobonaro, Superintendente Antoninho Mauluta, informa ba jornalista sira, iha kna’ar-fatin, Maliana, tersa ne’e.

Komandante PNTL munisípiu Bobonaro ne’e fó-sai katak, suspeitu DR idade 25 ho estatutu kazadu, moris iha suku Tapo-Taz, postu administrativu Bobonaro, munisípiu Bobonaro hanesan mós membru organizasaun balun iha Bobonaro.

DR mós nu’udar funsionáriu kontratadu ida iha instituisaun Estadu balu iha munisípiu Bobonaro no daudaun ne’e hala’o hela estudu iha universidade privada balun ho semestre haat.

Maibé Komandante Mauluta haktuir, iha prosesu investigasaun supeitu la deklara ba autoridade seguransa katak nia rasik mak lansa informasaun ne’e iha mídia sosiál facebook.

“Horisehik nia oferese ninia telefone, maibé ita check identidade ne’ebé iha nia facebook saida mak nia hakerek laiha. Ne’e mak ha’u hateten ba nia katak, sé o koopera di’akliu, duké o la koopera iha prosesu, ikus iha tribunál mak hatene nia rezultadu, ida-ne’e ladi’ak,” Superintendente ne’e dehan.

Komandante Mauluta agradese ba estrutura arte-marsiál balun iha Bobonaro tanba koopera ona autoridade seguransa hodi entrega suspeitu ne’e ba polísia, maibé ba oin PNTL kontinua buka-tuir supeitu seluk ne’ebé komenta tutan DR nia kronolojia facebook ho asaun provokativu hanesan hasoru instituisaun defeza no seguransa.

“PNTL no FDTL ne’e lutu nasaun nian, ema-ida labele uza organizasaun nia naran atu lori trata fali ita-nia seguransa nasaun nian. Ne’e duni presiza sidadaun hotu atu respeita,” Komandante PNTL munisípiu Bobonaro ne’e fó hanoin.

Notísia relevante: PNTL Bobonaro apresia komunidade nia maturidade iha eleisaun prezidensiál

Jornalisa     : Sérgio da Cruz

Editór           : Evaristo Soares Martins

iklan
iklan

Leave a Reply

iklan
error: Content is protected !!