DILI, 13 setembru 2022 (TATOLI)—Projetu komunitáriu ne’ebé implementa iha eskola hitu iha munisípiu Bobonaro foin mak atinje 10% tanba mudansa klimátika difikulta transporte sira labele tula materiál ba eskola.
“Ita iha munisípiu Bobonaro hetan projetu komunitáriu 21, maibé 14 atinje ona 25% ba leten no projetu komunitáriu hitu foin hahú no foin atinje 10%,” Diretór Servisu Edukasaun Munisípiu Bobonaro, Crispin Lopes Moniz, relata ba Agência Tatoli, via telefónika, tersa ne’e.
Notísia relevante: MEJD garante projetu komunitáriu konstrusaun infraestrutura eskola sei inaugura iha dezembru
Nia haktuir, udan kontinua tuun nafatin halo ekipa labele distribui materiál ba eskola hitu ho lalais atu hala’o prosesu reabilitasaun. Tanba ne’e maka foin bele hetan oportunidade hodi hala’o prosesu reabilitasaun.
Projetu komunitária 21 ne’ebé tama iha munisípiu Bobonaro ne’e kompostu hosi ensinu pre-eskolár tolu, ensinu báziku 17 no ensinu sekundáriu jerál ida, ho totál projetu 21, ho kustu projetu $2.409.512,51.
Projetu 14 ne’ebé atinje ona 25% ba leten ne’e tempu besik sei tama ona ba prosesu pagamentu faze daruak.
“Daudaun ne’e sira halo hela preparasaun ba relatóriu sira atu submete ba ministériu hodi bele hetan ona pagamentu tanba iha ona posibilidade Ministériu Edukasaun rasik maka sei halo pagamentu ba projetu sira,” nia tenik.
Jornalista : Tomé Amado
Editora : Julia Chatarina
