DILI, 13 setembru 2022 (TATOLI)–Jerente nasionál empreza Timor Resource, Filomeno de Andrade, informa, rezultadu teste laboratóriu amostra mina iha postu Feto Kmaus, ne’ebé lokaliza iha aldeia Tabacolot, suku Debos, postu administrativu Suai, munisípiu Covalima, hatudu perspetiva di’ak.
“Rezultadu teste amostra mina iha posu Feto Kmaus nian, ha’u sente momentu ne’ebá Governu hateten de’it katak ami la to’o alvu, ne’ebé sei hein hela estudu hosi laboratóriu nian. Estudu laboratóriu nian ne’e mai ona no hatudu iha perspetiva di’ak, kestaun de’it maka empreza atu halo perfurasaun ba liután okos tanba ein termu jeolójiku ne’e estrutura ne’ebé iha fratura barak, ita haree iha Suai ne’e gás barbarak tanba fatuk ne’ebé iha kraik mihis demais, ne’ebé presaun hosi kraik ne’e nakrahun iha fatin barbarak,” Jerente Nasionál empreza Timor Resource hateten, hafoin hasoru malu ho Primeiru-Ministru (PM), Taur Matan Ruak, iha Rezidénsia Primeiru-Ministru iha Farol, tersa ne’e.
Notísia relevante: Governu la hasai osan ba perfurasaun posu Feto Kmaus
Nia dehan, presiza halo estudu kle’an liután, nune’e jeolojia no tékniku espesialista ne’e hodi haree oinsá perfurasaun bele kontinua, karik perfurasaun vertikál, perfurasaun ba loos kraik sei halo perfurasaun orizontál atu nune’e bele kapta rekursu hotu ne’ebé iha.
“Ami-nia tékniku daudaun halo hela estudu iha área espesífiku hanesan posu Feto Kmaus. Ami-nia esperansa iha rezultadu di’ak tanba ami haree katak rezultadu estudu laboratóriu nian ne’e iha rezultadu di’ak, maibé atu espesíku, ida-ne’e nian kuandu buat hotu ami sei hato’o fali ba Autoridade Nasionál Petróleu no Minerál (ANPM) mak iha kapasidade fó sai ba públiku,” nia akresenta.
Jerente nasionál empreza ne’e haktuir, perfurasaun iha posu Feto Kmaus ne’e hala’o iha kle’an metru 660, ne’ebé la to’o alvu to’o kraik tanba gás maka’as tebes.
“Tanba ne’e sei paradu hela no tékniku sira sei halo estudu jeolójiku hodi haree tékniku saida mak ita bele aplika di’ak liután atubele kontinua perfurasaun,” nia tenik.
Antes ne’e, iha loron 27 outubru 2021, Governu halo lansamentu perfurasaun rai-maran iha posu Feto Kmaus iha área kontratu PSC TL-OT-17-08 Covalima, ne’ebé tuir kontratu Timor Resources no ANPM, sei halo perfurasaun posu ho mínimu kle’an metru 2.000 maibé ikus mai la to’o alvu.
Feto Kmaus hanesan posu antigu ne’ebé mak fura ikus iha tinan 1971, ne’ebé tama tinan 2021 kompleta tinan 50 fura fali iha rai-maran.
Hafoin empreza halo perfurasaun, liu tiha fulan-tolu ANPM deklara katak seidauk iha deskobrimentu komersiál, tanba ne’e empreza presiza halo teste amostra mina.
Jornalista : Antónia Gusmão
Editora : Julia Chatarina
