DILI, 13 setembru 2022 (TATOLI)—Empreza Timor Resources sei halo lansamentu perfurasaun mina-matan posu Lafaek, ne’ebé lokaliza iha postu administrativu Hatu-Udo, munisípiu Ainaro Rusa, iha semana oin.
“Semana oin sei hahú perfurasaun, daudaun ne’e preparativu besik atu kompleta ona, hein Autoridade Nasionál Petróleu no Minerál (ANPM) halo inspesaun no atribui serifikadu kompletu mak bele hahú perfurasaun,” Jerente nasionál empreza Timor Resources, Filomeno de Andrade, hateten hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, tersa ne’e.
Notísia relevante: Empreza Timor Resources sujere Governu autoriza harii fábrika mina iha Timor-Leste
Posu Lafaek nia mina-matan ne’ebé kle’an liu atu fura iha Timor-Leste ho kle’an to’o metru 3.500.
“Timor Resource daudaun halo planu perfurasaun mina-matan iha munisípiu Covalima espesífiku iha área Suai. Ita hala’o ona perfurasaun mina-matan iha posu Feto Kmaus iha área Matai no seluk posu Liurai iha Kamanasa. Daudaun atu hala’o fali perfurasaun iha área Labarai mak posu Lafaek, ne’ebé postu ida-ne’e maka agora atu hala’o no ramata tiha mak kontinua perfurasaun iha Ainaro,” nia akresenta.
Tuir planu empreza, perfurasaun iha posu Rusa kle’an to’o metru 2.909 no orsamentu ba investimentu hirak ne’e ho kustu millaun $48.
“Estudu viablidade ne’e prosesu naruk no halo kleur ona no bainhira estudu hirak ne’e hala’o maka hato’o ba ANPM, ikus liu molok atu hala’o perfurasaun tenki hatama hotu estudu ambientál. Ida-ne’e mós hato’o ona ba ANPM. Tuir estudu ambientál no atividade ne’ebé halo ne’e iha kategoria a, b no c, maibé ba perfurasaun ne’e kategoria a,” nia esplika.
Perfurasaun dahuluk iha posu Feto Kmaus, daudaun halo hela estudu ne’e molok atu hetan aprovasaun besik fulan-18, maibé ba iha fatin foho Ailiku ne’e ho durasaun fulan-neen de’it halo estudu kompletu. Estudu ambientál ne’ebé kobre área hotu hanesan kobre anin, rai-rahun, no seluk tan.
Jornalista : Antónia Gusmão
Editora : Julia Chatarina
