DILI, 14 setembru 2022 (TATOLI)–Diretór Eskola Ensinu Sekundáriu Jerál (ESJ) Finantil Comoro, Hermenegildo Mascarenhas, garante karteira eskolár (meza no kadeira) ba estudante finalista 555 sei sufisiente hodi partisipa iha ezame nasionál iha loron 24 outubru.
”Ami-nia proposta husu karteira eskolár ba Ministériu Eduasaun Juventude no Desportu (MEJD) hamutuk 300 resin, maibé ministériu bele responde de’it 60 tanba razaun sei responde mós eskola sira seluk iha territóriu nasionál. Tanba ne’e, ami bele jere ho didi’ak atu ita-nia estudante finalista 555 bele tuir ezame nasionál ho di’ak,” Direto informa ba Agência Tatoli, iha ninia knaar fatin, Comoro, kuarta ne’e.
Notísia relevante: MEJD hahú distribui karteira eskolár 2.000 ba eskola 16 iha Dili
Karteira eskolár ne’ebé eskola simu sei koloka iha sala aula sira hamutuk ho hirak ne’ebé iha ona atubele fasilita di’ak liután estudante sira iha tempu ezame nia laran.
“Baibain ezame nasionál realiza bainhira estudante désimu no désimu primeiru ano feriadu ona, nune’e bele fó biban ba estudante désimu segundu ano sira utiliza sala aula sira hodi tuur partisipa iha ezame nasionál. Tanba ne’e eskola garante estudante Finantil sei hetan fasilidade sufisiente hodi tuir ezame,” nia akresenta.
Tuir Diretór, karteira eskolár 60 ne’ebé simu ona, bainhira utiliza iha tempu aula normál ne’e la sufisiente tanba estudante Finantil hamutuk 1.400 resin ho sala aula 20, ne’ebé fahe ba turma dadeer no lorokraik.
“Apoiu ne’e foin faze dahuluk. Espera katak sei iha faze daruak bazeia ba proposta ne’ebé eskola iha, atu nune’e bele fasilita liután sala aula foun ne’ebé maka daudaun ne’e sei iha hela prosesu konstrusaun nia laran,” nia tenik.
Jornalista : Tomé Amado
Editora : Julia Chatarina
