DILI, 14 setembru 2022 (TATOLI)—Ministru Obra Públika, Abel Pires, aprezenta proposta iha reuniaun Konsellu Ministru (KM) ordinária, kuarta ne’e, ba autorizasaun adjudikasaun kontratu públiku ba reabilita estrada.
“Konsellu ministru aprova proposta ida ne’ebé aprezenta hosi Ministru Obra Públika, Abel Pires hodi autoriza adjudikasaun kontratu públiku sira ba reabilitasaun seksaun husi Laga bá Baguia pakote IV estrada munisipál no seksaun hosi Quelicai ba Ossu pakote III estrada munisipál sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu.
Notísia relevante: MOP anunsia rezultadu konkursu projetu estrada Laga-Baguia semana oin
Projetu Laga-Baguia ne’e aprova ona no Komisaun Nasionál Aprovizionamentu (CNA, sigla portugés) hato’o rezultadu konkursu katak sira hetan ona manan-na’in ba konstrusaun Laga-Baguia ho naruk kilómetru 38,03 no Quelicai–Ossu.
Projetu reabilitasaun estrada Laga-Baguia sei ezekuta empreza NORINCO International Coorporation ho montante orsamentu millaun $21,7.
Jornalista : Antónia Gusmão
Editora : Julia Chatarina
