VIQUEQUE, 14 setembru 2022 (TATOLI)–Xefe suku Uabubu, postu administrativu Ossu, munisípiu Viqueque, Joanico M. A da Cruz, informa, abitante 800 resin hosi uma-kain 400 resin falta bee-moos.
“Suku ne’e iha aldeia haat ho uma-kain purvolta 400 resin maka daudaun ne’e seidauk asesu ba bee-moos. Kondisaun ne’e difikulta ami ne’ebé hela iha área rurál,” Autoridade suku informa iha suku Uabubu, kuarta ne’e.
Autoridade ne’e haktuir, iha tempu okupasaun Indonézia, tinan 1994, konsege dada bee-moos ba parte Aisi no suku Uabubu, maibé hafoin Timor-Leste hetan independénsia, Cruz Vermelha de Timor Leste (CVTL) maka dada bee-moos ba komunidade.
“Komunidade ne’ebé hela besik foho hun sei asesu bee-moos, maibé komunidade ne’ebé hela iha suku Uabubu laran hasoru difikuldade, nune’e sira tenke la’o-ain kuaze kilómetru ida hafoin asesu bee-moos hodi kuru. Ita hatene katak ohin loron númeru populasaun aumenta ba beibeik, entaun sira utiliza bee la to’o. Foin lalais ha’u halo fali proposta ida hato’o Bee Timor Leste, Empreza Públiku (BTL, E.P) hodi aumenta tanke no distribui kanu ba komunidade,” nia akresenta.
Notísia relevante: BTL, E.P no empreza rua asina kontratu ba konstrusaun sistema bee-moos
Autoridade esforsu haruka ona pedidu kanalizasaun bee-moos ba BTL.EP, maibé to’o agora seidauk fó resposta ba komunidade nia preokupasaun.
“Ami-nia proposta bee-moos hato’o ona ba BTL, E.P munisípiu Viqueque no nasionál. Se bele haree ami-nia proposta tanba buat hotu ami tau ona iha proposta laran,” nia hato’o.
Suku Uabubu ho totál populasaun 2.717 ho totál uma-kain 578, iha aldeia Osogori, Lekibuti, Uailia no Letame mak seidauk asesu bee-moos no aldeia rua maka asesu ona bee-moos.
Jornalista : Vitorino Lopes da Costa
Editora : Julia Chatarina
