Maria Fátima asume kargu nu’udar superintendente Covalima durante oras haat
COVALIMA, 14 setembru 2022 (TATOLI)–Organizasaun Plan International Timor-Leste hili Maria do Rosario de Fátima Pires hosi Eskola Bázika Sentrál (EBC, sigla portugés) Sandalo asume kargu nu’udar superintendente Covalima durante oras haat hahú hosi tuku 08h00 to’o tuku 12h00, hodi halo inspesaun iha eskola bázika Ladi.
Notísia Relevante: Horta hakarak labarik feto ida asume pozisaun PR iha “loron mundiál labarik feto”
Reprezentante Plan Internasional iha munisípiu Covalima, Jhoni Nunes, hateten Plan implementa programa ida-ne’e kada tinan maibé iha munisípiu Covalima foin implementa dahuluk iha ámbitu atu komemora Loron Mundiál ba Labarik Feto ne’ebé sei selebra iha 11 outubru 2022.
“Plan International sempre komemora loron mundiál ba labarik feto ne’ebé monu iha 11outubru, ami hala’o de’it iha Dili no lori de’it labarik feto husi Aileu no Ainaro. Maibé, tinan ida-ne’e ami koko halo luan tan mai munisípiu Covalima, Baucau no RAEOA, nune’e labarik feto sira bele iha esperiénsia atu lidera,” Reprezentante Plan Internasional munisípiu Covalima ne’e hateten ba jornalista sira, iha resintu EBC Ladi, kuarta ne’e.
Objetivu hosi atividade ne’e, atu fó biban ba Maria Fátima bele manan esperiénsia oinsá atu sai líder hodi inspira joven sira seluk no mós atu empodera sira nia-an, nune’e ba futuru sira bele sai lideransa ida di’ak.
Benefisiu hosi programa ne’e atu akompaña labarik feto sira, nune’e ema hotu iha sosiedade bele sente hodi fó fatin ba labarik feto no joven feto sira-nia opiniaun iha polítika nivél foti desizaun
“Ita-foti iha dezenvolvimentu tenkr konsidera mós labarik feto nia opiniaun, foti desizaun no valoriza, nune’e sira mós sente sira mak ko’alia la’ós ema seluk mak ko’alia sira-nia problema rasik. Nune’e, ita tenke envolve labarik feto no joven feto sira iha prosesu dezenvolvimentu,” nia dehan.
Antes Plan Internasional iha Timor-Leste realiza atividade ne’e, dahuluk hala’o formasaun ba estudante na’in-30, hafoin ne’e mak deside labarik na’in-tolu (3) ne’ebé bele reprezentante eskola São Luis Gonzaga no EBC Sandalo
Superintendente Interina Maria do Rosario de Fátima Pires sente orgullu maske sei estudante hela maibé bele hetan oportunidade hodi bele asume kargu hanesan superintendente hodi responsabiliza no bele hatene lidera.
“Ha’u sente orgullu, ohin loron, ha’u bele hetan oportunidade ida-ne’e hodi sai hanesan superintendente interina ba iha edukasaun munisipál Covalima hodi halo inspesaun mai iha Eskola Bazika Sentrál Ladi. Liuhosi oportunidade ida-ne’e, ha’u bele hatene lidera no iha responsablidade,” nia dehan.
Durante nia asume kargu sai superintendente interina hodi halo inspesaun ba iha Eskola Bázika Sentrál Lad,i atu halo avaliasaun ba inspetór eskola sira-nia servisu no haree problema ne’ebé eskola refere enfrenta.
Notísia Relevante: Cristina Sai "Prezidente Repúblika" Durante Oras Ida
Jornalista : Celestina Teles
Editór : Cancio Ximenes
