iklan

EKONOMIA, HEADLINE

Portu Tibar halo deskarregamentu dahuluk ba kontentór 200 resin hosi Singapura

Portu Tibar halo deskarregamentu dahuluk ba kontentór 200 resin hosi Singapura

Traballadór sira ho ekipamentu halo deskargamentu dahuluk ba kontentór hosi Singapura, iha iha Portu Tibar, kuarta (14/09). Imajen Tatoli/António Daciparu

LIQUIÇÁ, 14 setembru 2022 (TATOLI)—Diretór Ezekutivu Timor Port SA, Rafael Ribeiro, hateten, kuarta ne’e, Portu Baia Tibar hahú halo deskarregamentu dahuluk ba kontentór 200 resin hosi Singapura.

Traballadór sira ho ekipamentu halo deskarregamentu dahuluk ba kontentór hosi Singapura, iha Portu Tibar, kuarta (14/09). Imajen Tatoli/António Daciparu

“Portu Tibar nia kondisaun maioria prontu atu hahú operasaun, tanba ne’e ohin hahú deskarregamentu dahuluk ba kontentór 200 resin hosi Singapura,” Diretór Ezekutivu Timor Port SA hateten iha Portu Tibar, kuarta ne’e.

Objetivu deskarregamentu ba kontentór ne’e hakarak atu koko ekipamentu, sistema, no autoridade ninia servisu inklui ema ne’ebé envolve iha servisu Portu Tibar, nune’e bele hatene posibilidade halo operasaun tomak.

“Tanba iha loron 30 setembru ne’e ita sei halo operasaun full, nune’e ohin ita koko simu kontentór 200 resin no ró fila lori fali ho kontentór mamuk hamutuk 100 resin,” nia akresenta.

Notísia relevante: Konstrusaun Portu Tibar la’o hela no sei inaugura iha tinan ne’e

Traballadór sira ho ekipamentu halo deskarregamentu dahuluk ba kontentór hosi Singapura, iha Portu Tibar, kuarta (14/09). Imajen Tatoli/António Daciparu

Tuir estimasaun Portu Tibar nia servisu atendimentu ba kontentór sira hahú to’o oras 15 ka 16 nia-laran, bainhira laiha problema.

Tuir planu Portu Tibar kada tinan bele halo deskarregamentu kontentór hamutuk milliaun ida.

“Agora ita atu hahú ne’e maizumenus volume sei hanesan ho Portu Dili, tanba foin hahú ita presiza fó informasaun no komunikasaun ba mundu no ba ró na’in hotu, inklui importadór sira bainhira ema hatene ona mak foin simu kontentór ho volume boot,” nia esplika.

Ró hosi Singapura ne’ebé ohin tula kontentór 200 resin ne’e mak Mariana Express Lines Pte.Ltd.

“Ami haksolok tebes foin dahuluk vizita no atraka iha Portu Tibar, ne’ebé ami haree katak dezenvolvementu ne’e postivu tebes no ekipamentu hotu ne’ebé mak iha mesak foun de’it. Ró atraka mós kondisaun di’ak tebes,” Diretór Jerál Ró Mariana Express Lines Pte.Ltd, Lee Chin Giaf, hateten.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!