iklan

EDUKASAUN, HEADLINE

Sala tolu iha Eskola ESJ Finantil harii ho kustu $71.000

Sala tolu iha Eskola ESJ Finantil harii ho kustu $71.000

Osan dolar Amérika. Imajen/Espesiál

DILI, 14 setembru 2022 (TATOLI)—Konstrusaun fíziku sala aula tolu iha Eskola Ensinu Sekundáriu Jerál (ESJ) Finantil Comoro atinje ona 25%, ho kustu projetu $71.000.

Diretór Eskola ESJ Finantil Comoro, Hermenegildo Mascarenhas, hateten, konstrusaun verba ba estudante sira paradu durante fulan-rua tanba hetan intervensaun hosi Ajénsia Dezenvolvimentu Nasionál (ADN) ba prosesu pagamentu projetu komunitária sira.

“Loloos ne’e agora ita tama ona prosesu konstrusaun faze daruak, maibé projetu ne’e sai paradu tanba hetan intervensaun hosi ADN. Tanba ne’e konstrusaun  la la’o durante fulan-rua,” Diretór relata ba Agência Tatoli, iha ninia knaar fatin, Comoro, kuarta ne’e.

Notísia relevante: MEJD garante projetu komunitáriu konstrusaun infraestrutura eskola sei inaugura iha dezembru

Maski nune’e, parte eskola hatama ona pedidu estensaun, ne’ebé parese iha tempu besik bele hetan ona prosesu pagamentu faze dahuluk atu nune’e bele tama ba konstrusaun faze daruak.

“Tanba ne’e, hosi 25% ne’ebé maka atinje daudaun ne’e bele garante katak molok tinan ne’e ramata, kuandu laiha impedimentu ruma bele finaliza ona. Husu ba ministériu atu aselera prosesu pagamentu atubele konklui konstrusaun,” nia tenik.

Totál eskola 16 iha munisípiu Dili ne’ebé tama iha planu projetu komunitáriu kompostu hosi Eskola Pre-Eskolár rua, Eskola Ensinu Báziku (EBF) sia, Eskola ESJ haat no Eskola Tékniku Vokasionál ida, ho kustu projetu $1.680.680,12.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!