Autoridade RAEOA sei promove produtu lokál lima iha aniversáriu sidade Kefamenanu
OÉ-CUSSE, 15 setembru 2022 (TATOLI)–Autoridade Rejiaun Administrativa Espesiál Oé-Cusse Ambeno (RAEOA), daudaun ne’e identifika ona produtu lokál lima hodi halo promosaun iha festivál loron aniversáriu tinan-100 sidade Timur Tengah Utara (TTU), Kefamenanu, Repúblika Indonézia.
Sekretáriu Rejionál ba Asuntu Komersiu no Indústria, Pedro da Silva Boquifai, informa, antes ne’e Prezidente Autoridade RAEOA, simu ona konvite hosi Autoridade TTU hodi partisipa iha festivál loron aniversáriu tinan-100 ba sidade Kefamenanu, nune’e Prezidente Autoridade RAEOA hatún despaxu ba Adjuntu no Adjunta Prezidente Autoridade, hodi organiza ba preparasaun.
“Ita simu ona orientasaun hosi adjuntu na’in-rua, katak Sekretáriu Komérsiu ho Agrikultura mak prepara grupu no identifika produtu atu promove iha aniversáriu TTU nian, tán ne’e maka ita-nia preparasaun la’o ona no proposta submete ona ba Prezidente Autoridade hodi hetan aprovasaun, nune’e bele mobiliza grupu agrikultura prepara produtu sira,” Pedro da Silva Boquifai, informa ba Agência Tatoli iha Oé-Cusse, kinta ne’e.
Nia informa, liga preparasaun produtu, daudaun ne’e grupu agrikultór sira sei prepara hodi aprezenta ba ekipa tékniku mak sei lori ba, ho Sekretáriu Rejionál Agrikultura no Komérsiu Indústria, tanba liga ho prosesu free and balance ne’ebé RAEOA adota.
“Ita identifika ona produtu lima hanesan, benden, tais tuir modelu suku 18 nian ne’e ita-nia grupu sira prepara ona, figus, tua hudi, xá figus, káfe Lakufoan no produtu seluk sei iha faze identifikasaun, maibé produtu lima ne’e tama ona tarjetu atu promove iha loron aniversáriu TTU nian,” nia informa.
Nia fó-sai katak, molok dezloka autoridade RAEOA sei konsulta ho autoridade sira iha serbisu fronteira bele iha koñesimentu ba produtu hirak-ne’e.
“Kalendáriu atu dezloka, daudaun ne’e ita hein de’it aprovasaun hosi Prezidente Autoridade, maibé tuir ita-nia planu antes enseramentu iha loron 22 setembru, entaun ba preparasaun ne’e antes loron haat ita-nia grupu sira tenke iha-ne’ebá ona, tán ne’e mak ita deside iha segunda, 19 sira bele dezloka ona,” nia katak.
Atividade ne’ebé hala’o durante ne’e maka hanesan, promove produtu tais Oé-Cusse nian liuhosi festivál karnavál tais no atividade seluk tán.
Notisia relevante: RAEOA prepara grupu feto aprezenta produtu tais iha festivál Kefamenanu
Jornalista : Abílio Elo Nini
Editór : Evaristo Soares Martins
