iklan

NASIONÁL, EDUKASAUN

CNC introdús dokumentu istóriku 1974-1999 ba turista na’in-125

CNC introdús dokumentu istóriku 1974-1999 ba turista na’in-125

Turista na’in-125 vizita Centro Nacional Chega (CNC). Imajen/Espesiál.

DILI, 15 setembru 2022 (TATOLI)—Ofisiál Seniór Divizasaun Edukasaun no Formasaun iha Centro Nacional Chega (CNC), Matias dos Santos informa, kinta ne’e, CNC halo introdusaun dokumentu istóriku hosi 1974-1999 kona-ba funu no violasaun direitu umanu ba turista na’in-125 ne’ebé vizita CNC.

Notísia Relevante: Turista sira vizita AMRT atu hatene Timor-Leste nia istória funu

Turista na’in-125 vizita Centro Nacional Chega (CNC). Imajen/Espesiál.

“Ohin, ita-nia turista na’in-125 mak halo vizita mai CNC. Ohin, ami halo introdusaun ba sira kona-ba fatin istóriku, liuliu komarka nian. Ami mós esplika ba sira kona-ba dokumentu istóriku sira-ne’ebé mak prezerva hela iha ne’e, entaun ami informa hela ba sira no sira ida-idak la’o haree, tanba kuaze ho kuantidade ne’ebé barak, entaun ami husik sira la’o hodi haree rasik informasaun sira-ne’ebé prezerva iha fatin ne’e,” Matias dos Santos hateten ba Agência Tatoli iha nia kna’ar fatin, Dili, kinta ne’e.

Tuir nia, bainhira turista sira atu halo vizita, CNC la iha preparasaun espesífiku atu simu vizita turista hosi Ró kruzeiru Le Lap’erouse hosi Austrália ne’e, tanba hanesan baibain vizitór sira ne’ebé halo ona vizita CNC halo introdúsaun ba sira kona-ba servisu ne’ebé CNC no CAVR halo.

“Hosi ida-ne’e, ami mós introdús ba sira kona-ba relatóriu ne’ebé Indonézia no Timor-Leste halo. Ami mós esplika ba sira kona-ba konteúdu ezibisaun sira-ne’ebé iha CNC kona-ba prizaun no prizióneiru polítiku sira iha komunidade internasionál nia apoia ba Timor-Leste no matéria sira kona-ba direitu umanu. Ami mós hatudu faktu sira-ne’ebé nafatin eziste iha sela nakukun hodi aprezenta ba sira,” nia dehan.

Entaun, iha vizita ne’e turista sira barak mak apresia tebes, tanba sira bele mai haree sítiu no dokumentu sira-ne’ebé sei orijen hela liu-liu hanesan gráfiku sira-ne’ebé mak iha, mensajen sira ne’ebé prizioneiru polítiku sira hakerek hela iha sela nakukun ne’ebá, entaun sira haree sasán sira-ne’e, sira sente kontente ho sira-nia vizita ne’e.

Hosi turista na’in-125 ne’e nia vizita, nia parte haree istória Timor-Leste ne’e impotante duni ba ema internasionál sira tanba liga ho istória no kontribuisaun hosi país oioin to’o iha tinan 24 nia laran Timor-Leste hetan ukun rasik an.

“Ida-ne’e istória oioin ne’ebé kontribuisaun ema barak nian iha tempu ne’ebá, entaun sente orgullu ema estranjeiru, turista no malae sira ne’ebá dook, maibé sira hakarak mai hatene Timor-Leste nia istória, ha’u espera katak ita timoroan hotu-hotu liu-liu estudante foinsa’e sira mós bele iha hakarak hanesan mós ho ita-nia malae sira atu bele mai vizita sítiu istóriku iha Dili laran, tanba kuaze fatin istóriku sira iha Dili barak. Ho ida-ne’e, espera ita-nia joven sira mós iha inisiativa di’ak hodi mai vizita sitíu istóriku sira,” nia dehan.

Nune’e, daudaun ne’e sítiu istóriku liu-liu CNC nafatin nakloke ba públiku, entaun nia parte nafatin konvida atu jerasaun sira bele mai aprende Timor-Leste nia istória. no aleinde ne’e konvida mós Instituisaun relevante sira-ne’ebé servisu ba Estadu bele mai haree istória sira ne’ebé CNC prezerva, atu nune’e sai mós referénsia ida ba sira atu labele repete sá mak akontese ona iha tempu uluk nian.

Entretantu, tuir informasaun hosi Ofisiál Seniór Divizasaun Edukasaun no Formasaun, Matias dos Santos, katak vizitante internasionál sira-ne’ebé durante ne’e vizita CNC hosi tinan 2017 to’o 2022 ne’e hamutuk 3000-resin.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!