iklan

NASIONÁL, EDUKASAUN

Turista sira vizita AMRT atu hatene Timor-Leste nia istória funu

Turista sira vizita AMRT atu hatene Timor-Leste nia istória funu

Turista sira hosi Austrália vizita AMRT Dili, kinta (15/09). Imajen Tatoli/António Daciparu.

DILI, 15 setembru 2022 (TATOLI)—Diretór Nasionál ba Unidade Edukativa no Kultura iha Arquivo e Museu da Resistência Timorense (AMRT), Alvaro Rosário Vasconcelhos, informa turista na’in-30 ne’ebé ohin (kinta, 15 setembru) vizita AMRT ne’e hakarak hatene Timor-Leste nia istória funu durante tinan 24 nia laran ne’e.

Notísia Relevante: Ró kruzeiru Le Lapérouse hosi Austrália lori turista to’o ona Dili

Turisa na’in-30 hosi na’in-125 ne’ebé vizita Dili ho Ró Kruzeiru Le Lapérouse hosi Austrália ne’e, kinta (15 setembru) dadeer ne’e, vizita AMRT atu hatene Timor-Leste nia istória funu durante tinan 24 nia laran ne’e. Imajen Tatoli/Nelai Fernandes.

“Objetivu sira mai iha ne’e atu pasear no hakarak kuñese Timor no hatene istória Timor nian, oinsá ita funu durante tinan 24 bele hasoru país boot tebes hosi Indonézia. Ne’eduni, ohin sira mai haree, sira admira no balun sente xokadu tanba sira nunka haree ho matan ba buat ne’ebé ita pasa durante tempu okupasaun,” Alvaro Rosário Vasconcelhos hateten ba jornalista sira iha Arquivo e Museu da Resistência Timorense (AMRT), Dili.

Nia informa, durante turista sira hala’o vizita iha AMRT ne’e, sira vizita espozisaun hodi haree objetu no dokumentu sira-ne’ebé AMRT prezerva no konserva hela.

Tanba tempu ba sira limitadu, sira la konsege tama iha fatin balun hodi haree no lee livru tanba sira mai ho tempu limitadu, entaun sira la konsege haree livru istóriku sira.

Maske nune’e, nia afirma, iha vizita ne’e turísa hamutuk na’in-30 mak vizita dahuluk AMRT no sira ida-idak sei kontribui osan $1, nune’e sira-nia konstribuisaun hamutuk $30.

“Maibé, iha tabela se vizitante mai ho grupu ne’e selu $15 no vizita individuál ne’e selu $1, ne’e vale ba vizitante nasionál no internasionál. Maibé, ba labarik no estudante sira-ne’e, sira kontribui de’it 0,25 sentavus kada ema ida,” nia informa.

Turísa ida hosi Italia, Giuliana Baiocco, hateten objetivu mai vizita iha Arquivo e Museu da Resistência Timorense (AMRT) ne’e, tanba hakarak deskobre istória Timor-Leste nian liu-liu iha luta pasadu nian ne’ebé timoroan sira luta ba Timor-Leste nia autodeterminasaun ne’e.

“Tanba, antes ne’e ami halo briefing ona ba AMRT kona-ba Timor nia pasadu ne’ebé mak akontese. Ho nune’e, ami mai hakarak hatene no kompreende liután kona-ba istória iha Timor-Leste,” nia dehan.

Iha vizita ne’e, nia dehan, turista sira mai haree kona-ba akontesimentu violasaun direitu umanu ne’ebé akontese durante tinan 1975 to’o 1999 iha Timor-Leste.

“Ohin, ha’u mai haree istória kona-ba 1975 to’o 1999 maske la hotu, maibé ha’u akompaña buat balun. Ne’ebé, ha’u sente triste tanba haree ema mate barak,” nia dehan.

Entretantu, tuir informasaun hosi Diretór Nasionál ba Unidade Edukativa no Kultura iha Arquivo e Museu da Resistência Timorense (AMRT), Alvaro Rosário Vasconcelhos, katak turísa ne’ebé vizita iha AMRT ne’e hamutuk na’in-125, ne’ebé vizita iha faze dahuluk na’in-30, faze daruak na’in-ualu (8) no seluk sei vizita iha parte lorokraik.

Tuir planu, durante iha Dili, turista sira-ne’e sei vizita AMRT, Centro Nacional Chega (ANC) iha antigu komarka Balide no sei vizita Cristo Rei Fatucama, Tais Market no Asosiasaun Kafé Timor-Leste ne’ebé fasilita hosi ajénsia Manny Timor Tour.

Enkuantu, turista sira-ne’ebé mai vizita AMRT ne’e mai hosi nasaun Itália, Austrália, Fransa, Amérika, España, Inglatera, Nova Zelandia no seluk tan.

Jornalista : Nelia Fernandes

Editór        : Cancio Ximenes

iklan
iklan

Leave a Reply

iklan
error: Content is protected !!