DÍLI, 29 Maiu 2026 (TATOLI) – Fundasaun Ahisaun, organizasaun ne’ebé fó atensaun ba ema ho defisiénsia iha Timor-Leste, durante tinan tolu ikus ne’e prodús ona ema ho defisiénsia hamutuk 200 liuhosi programa formasaun iha área komputadór.
Aleinde formasaun komputadór, Fundasaun Ahisaun mós oferese programa kapasitasaun seluk hanesan lian ingleza, lian portugés, kostura no resiklajen hodi hasa’e koñesimentu no abilidade ema ho defisiénsia sira.
Diretora Ezekutiva Fundasaun Ahisaun, Ermenciana Alves, hateten maski organizasaun ne’e iha programa kapasitasaun oioin ba juventude ho defisiénsia, maibé atualmente Ahisaun fó prioridade liu ba formasaun komputadór tanba área ida-ne’e hetan interese boot husi partisipante sira.
“Maioria juventude ho defisiénsia ne’ebé tuir formasaun iha Ahisaun hili liu área komputadór. Tanba ne’e ami fasilita sira aprende kona-ba software no hardware, inklui uza Microsoft Word, Excel no PowerPoint,” dehan Ermenciana Alves ba jornalista TATOLI iha nia knaar-fatin iha Fatuhada, Díli, iha sexta-feira ne’e.
Nia hateten tan katak husi ema na’in-200 ne’ebé hetan ona formasaun komputadór, balu servisu ona iha instituisaun Estadu no kompania privada, no balu sai ona formadór iha sentru treinamentu Ahisaun rasik.
Ermenciana reforsa katak atividade Fundasaun Ahisaun bele kontinua lao tanba hetan apoiu finanseiru husi Gabinete Primeiru-Ministru no Ministériu Solidariedade Sosiál no Inkluzaun (MSSI).
Fundasaun Ahisaun harii iha tinan 2000 ho objetivu atu tulun no kapasita ema ho defisiénsia iha Timor-Leste. Organizasaun ne’e servisu atu promove inkluzaun sosial no fó oportunidade hanesan ba ema hotu, liuliu iha área edukasaun no dezenvolvimentu abilidade.
Atividade prinsipál sira inklui formasaun artezanatu, komputadór, lian ingleza no portugés, no mós apoiu edukasionál ba labarik no jovem ho defisiénsia atu asesu ba eskola no ensinu superior.
Programa sira ne’e konsidera importante tebes tanba ajuda ema ho defisiénsia sira hasa’e kapasidade, dezenvolve abilidade praktika no asegura sira-nia direitu atu partisipa ativamente iha sosiedade hanesan sidadaun sira seluk.
Jornalista: Camilio de Sousa
Editór: Filomeno Martins
