iklan

EKONOMIA, HEADLINE

Ró kruzeiru Le Lapérouse hosi Austrália lori turista to’o ona Dili

Ró kruzeiru Le Lapérouse hosi Austrália lori turista to’o ona Dili

Ró kruzeiru Le Lapérouse hosi Austrália lori turista, atraka iha Portu Dili, kinta (15/09). Imajen Tatoli/António Daciparu

DILI, 15 setembru 2022 (TATOLI)—Ró kruzeiru Le Lapérouse hosi Austrália ne’ebé lori turista 125, atraka ona iha Portu Dili iha tuku 07:30 dadeer, ne’ebé simu ho tebedai dansa kulturál feto Kmook Lero hosi munisípiu Lautém.

Turista Austrália tuun hosi ró kruzeiru Le Lapérouse, iha Portu Dili, kinta (15/09). Imajen Tatoli/Francisco Sony

Bainhra turista sira to’o Portu Dili, ajénsia Manny Timor Tour prepara ona bus 12 hodi fasilita durante loron-ida iha Dili.

Tour Guide Manny Timor Tour, Domenico Luís, hateten, atividade ne’ebé turista sira sei halo iha Timor-Leste mak parte dadeersan sei vizita fatin sira hanesan Centro Nacional Chega (CNC), Arkivu Muzeu Rezisténsia Timorense (AMRT), Santa Crus, Tais market, Asosiasaun Kafé Timor-Leste, hafoin sira filafali bá Portu Dili no parte lorokraik, hahú tuku 14:00 sira kontinua vizita ba Cristo Rei.

“Sira nia viajen mai, sira selu iha ajénsia ne’ebé lori sira no ajénsia ne’e kontratu fali ho ami-nia ajénsia Manny Timor Tour mak ami selu fali reseita ba Estadu ne’ebé atu hatene reseita hira mak tama, bainhira atividade turista sira ne’e hotu ona mak ita hatene,” Tour Guide hateten ba Agência Tatoli, iha Portu Dili, kinta ne’e.

Notísia relevante: Ró kruzeiru tula turista na’in-125 vizita tasi Uatabo Baucau

Turista ró kruzeiru hahú haree produtu artezenatu sira ne’ebé negosiante sira fa’an iha Portu Dili, kinta (15/09). Imajen Tatoli/Francisco Sony

Ajénsia Austronesia hosi Austrália mak daudaun koopera ho ajénsia Manny Timor Tour hodi fasilita turista sira mai vizita Timór.

Iha fatin ketak, Turista, Walter Muhleman, hafoin vizita fatin istóriku Antigu Komarka iha CNC, hateten, foin dahuluk ba nia vizita Timór no nia kontente tebes.

“Hosi hau-nia vizita mai Timor-Leste saida mak hetan no haree mak fatin istóriku sira hanesan CNC ne’e. Bainhira ha’u fila sei konta ba hau-nia família no mundu kona-ba prosesu Timor-Leste nia luta ba independénsia,” nia dehan.

Turista ne’e mós husu ba Governu Timor-Leste, bainhira vítima sira ne’ebé hetan torturasaun durante funu sei moris karik tenke fó atendimentu dignu ba sira tanba liuhosi imajen no istória, haree katak povu terus mak foin hetan independénsia.

Tuir observasaun Agência Tatoli iha terrenu, nota katak Polísia Nasionál Timor-Leste (PNTL) akompaña turista sira desde ró kruzeiru atraka iha Portu Dili no vizita ba fatin ne’ebé planeia ona.

Tuir informasaun, iha parte lorokraik, Prezidente Repúblika, José Manuel Ramos Horta sei vizita turista sira iha Portu Dili.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!