BAUCAU, 14 setembru 2022 (TATOLI) – Turista na’in-125 ne’ebé utiliza ró kruzeiru Le Lapérouse hosi Austrália vizita tasi Uatabo, Baucau durante oras haat.
Tour Guide hosi empreza Manny Timor Tour, Dominico Luís Reinaldo, hateten, atividade ne’ebé turista sira sei hala’o iha Baucau mak vizita poténsia turizmu tasi Uatabo, aprenzentasaun dansa kulturál inklui komunidade sira oferese nú to’o oras haat antes kontinua halo viazen ba Dili.
“Sira-nia prezensa hanesan tour atu haree poténsia turizmu inklui observa situasaun komuinidade nian,” Dominico Luís Reinaldo informa ba TATOLI iha Baucau, kuarta ne’e.
Dominico Luís, esplika, daudaun ne’e parte responsável kontinua halo preparasaun hodi simu turista sira refere nia prezensa iha Dili, liuliu iha loron-kinta,15 setembru hanesan preparasaun karreta ne’ebé sei fasilita durante prezensa iha Dili.
Tuir planu, durante iha Dili, turista sira refere sei vizita fatin istóriku hanesan Sentro Nasionál Chega (CNC, sigla portugés), Arkivu Muzeu no Rezisténsia Timorense (AMRT), Santa Cruz no Cristo Rei.
Manny Timor Tour fasilita turista sira vizita Timor-Leste hamutuk na’in-125 kompostu hosi nasaun Austrália, Portugál, Noruega, Austria no Islándia.
Prezensa turista sira-nee hetan partisipasaun hosi autoridade munisipál hanesan Prezidente Autoridade Munisipál (PAM) Baucau, Olívio ‘Bou-Lesa’ Freitas, Komandante PNTL Baucau, Superintendente António de Sá no komunidade iha área Uatabo.
Jornalista : Natalino Belo
Editór : Evaristo Soares Martins
