iklan

NASIONÁL, POLÍTIKA

Fraternidade umana promove kultura diálogu nu’udar dalan kolaborasaun komun

Fraternidade umana promove kultura diálogu nu’udar dalan kolaborasaun komun

Prezidente Parlamentu Nasionál, Aniceto Longuinhos Guterres Lopez.

DILI, 15 setembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hakarak foti liafuan balun hosi dokumentu deklarasaun Fraternidade Umana hodi promove kultura diálogu nu’udar dalan kolaborasaun komun.

Notísia Relevante: Parlamentu Nasionál sei fó atensaun diskute OJE 2023

“Ha’u hakarak foti liafuan balun hosi dokumentu deklarasaun Fraternidade Umana ne’ebe dehan, “Kultura dialógu nu’udar dalan, kolaborasaun komun nu’udar konduta, no koñesimentu mútuo nu’udar métodu no kritériu” (a cultura do diálogo como caminho, a colaboração comum como conduta, e o conhecimento mútuo como método e critério), hodi buka solusaun ba problema sira iha ita-nia rain,” Prezidente PN ne’e hato’o iha nia intervensaun iha abertura sesaun solene kinta lejislativa iha kinta lejislatura, iha sala plenária, kinta ne’e.

Lidér Segundu órgaun soberania ne’e hateten, lia tatoli ida-ne’e relevante mós mai Timor-Leste iha dinámika konstrusaun Estadu, iha governasaun no jestaun interrese Estadu nian no bainhira nasaun hasoru problema sira-ne’ebé afeta funsionamentu normál instituisaun Estadu nian sira.

“Tanba ne’e ita hotu iha responsabilidade morál no polítika atu kria ambiente ne’ebé permite prinsípiu hirak ne’e, leno nafatin ita hotu nia esforsu konstrusaun Estadu no rekonstrusaun sosiedade Timor-Leste,” nia dehan.

Timor-Leste halo esforsu ho sériu atu Estadu nia adezaun ba Deklarasaun Fraternidade Umana ba Pás Mundiál no Konvivensia Komun sai duni valór orientadór iha prosesu  rekonstrusaun sosiedade Timor-Leste.

Tuir nia, ho adezaun ida-ne’e reforsa tan Timot-Leste nia kompromisu ba rekonstrusaun sosiedade Timor-Leste ne’ebé justu, prósperu, solidáriu no fraterna ne’ebé konsagra ona iha Preâmbulu Konstituisaun RDTL.

Iha parte seluk, Aniceto Guterres hateten iha kontekstu globál Timor-Leste hasoru mós tensaun no konflitu jeopolítiku ne’ebé nia afeta vida sosiál, ekonómika no polítika iha  nasaun barak inklui Timor-Leste.

Tuir observasaun hosi dokumentu deklarasaun Fraternidade Umana katak mundu oras ne’e tama tiha ona iha “Terceira Guerra Mundial aos Pedaços”.

Iha situasaun hirak ne’e nia laran, Parlamentu Nasionál aprova Rezolusaun Númeru 11/2022, 13 maiu, kona-ba adezaun Timor-Leste ba deklarasaun Fraternidade Umana ba Pás Mundiál no Convivénsia Komum ne’ebé Santo Padre Papa Francisco no Imam Boot Al-Azhar Ahmad Al-Tayyeb asina iha 4 fevereiru 2019, no Timor-Leste nu’udar primeiru nasaun iha mundu ne’ebé adopta deklarasaun ne’e.

Nia informa, iha 19 setembru ne’e, ho esforsu Xefe Estadu nian, sei halo lansamentu sentru Fraternidade Umana iha Timor-Leste ho prezensa alta entidade Estadu nian, Arsebispu Edgar Peña Parra, Vise Primeiru-Ministru Santa Sé nian, Kardeál Timor-Leste, Arsebispu Dom Virgílio Kardeál do Carmo da Silva, SDB no konvidadu sira seluk.

Nia afirma, ho adezaun ne’e Timor-Leste kompromete an ba promove valór Fraternidade Umana no Konvivénsia Komun ho dame iha TL nia lala’ok dezenvolvimentu, iha TL nia selebrasaun eventu Estadu nian iha konvivénsia bilaterál no multilaterál.

Ho naroman hosi valór hirak ne’e, TL tama ba tinan 2023, tinan eleisaun parlamentár, hodi halo alteransia ba reprezentante povu nian ne’ebé asume kargu politiku, lejisladór, fiskalizadór iha Estadu direitu demokrátiku.

Liuhosi eventu demokrátiku ida-ne’e mak fó kontinuidade funsionamentu ba orgaun soberania rua dala ida, Parlamentu Nasionál no formasaun Governu.

“Tanba ne’e iha kada tinan eleitorál, mekanizmu demokrátiku permite realizasaun atividade polítika partidária, forma aliansa pre-eleitorál ka post-eleitorál, mobilizasaun masa, komísiu, diskursu  polítiku, debate politika tematika hodi ajuda povu halo opsaun politika no deside kanaliza nia votu loron eleisaun,” nia hateten.

Meiu hirak ne’e tenke fomenta ho asuntu Estadu nian, asuntu dezenvolvimentu sosiál no ekonómiku, asuntu seguransa, estabilidade, soberania Estadu direitu demokrátiku no relaaun bilaterál no multilaterál entre nasaun sira iha mundu.

“Ne’e mak ezijénsia sira ba reforsa dezenvolvimentu integradu no sustentavel, agora no iha future,” nia dehan.

Nune’e, Aniceto Guterres hateten tempu to’o ona atu artikula didiak no loloos asuntu hirak ne’e hodi hametin instituisaun Estadu no relasaun institusionál ne’ebé metin hosi hasai povu hosi desinformasaun no mal-informasaun.

Demokrásia ho nia instrumentu sira ho objetivu atu hametin Estadu direitu demokrátiku no fó kontinuidade ba dezenvolvimentu integradu no sustentavel.

Konflitu geopolitiku no krize ekonomiku ne’ebé mundu enfrenta bolu atensaun atu país ida-idak halo esforsu hodi hasa’e nia kapasidade reziliénsia iha aspetu no setor hotu-hotu.

Atu reforsa kapasidade reziliensia multi-setorál no multidimensionál ne’e mak, alternansia governasaun no lideransa instituisaun demokrátika Estadu nian sira, sidadaun hotu-hotu presiza ezerse sira-nia direitu ho kualidade sidadania sívika no ho responsabilidade.

“Ita hotu nu’udar operadór  no servidór instituisaun Estadu nian, partidu polítiku, líder politíku, líder oppzisaun no sidadaun tomak hatudu partisipasaun no kontribuisaun ho kualidade no responsabilidade, hamutuk kaer metin responsabilidade atu garante nafatin pás, estabilidade no respeita malu iha atividade polítika eleitorál,” nia hateten.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!