iklan

NASIONÁL, POLÍTIKA

Parlamentu Nasionál sei fó atensaun diskute OJE 2023

Parlamentu Nasionál sei fó atensaun diskute OJE 2023

Sesaun plenária Parlamentu Nasionál. Imajen/TATOLI

DILI, 15 setembru 2022 (TATOLI)—Prezidente Parlamentu Nasionál, Aniceto Guterres Longuinhos Lopes, hateten iha sesaun lejislativa ikus  ba lejislatura dalimak ne’e, Parlamentu Nasionál sei fó atensaun ba diskusaun Orsamentu Jerál Estadu (OJE) 2023 no prioridade sira seluk.

Notísia Relevante: Deputadu sira sei resesu iha 15 jullu to’o 15 setembru 2022

“Iha kinta sesaun lejislativa ne’ebé oras ne’e ita loke daudaun, hanesan baibain sei fó atensaun ba diskusaun kona-ba OJE 2023 ne’ebé tuir kalendáriu ne’ebé bazea ba Lei Enquadramento Orçamental e Gestão das Finanças Públicas foun, sei konklui molok fulan novembru ramata,” Prezidente PN hateten iha intervensaun abertura sesaun lejislativa iha lejislatura dalimak, iha sala plenária PN, kinta ne’e.

Molok tinan ida-ne’e ramata, Parlamentu Nasional sei debate no aprova mós lei ida kona-ba protesaun labarik no joven sira-ne’ebé iha perigu laran atu salvaguarda no garante kondisaun  ba sira-nia moris nu’udar potensiál rekursu umanu ba futuru.

Iha nivel internu parlamentár sei kontinua ho medida lejislativa ba reforsa reforma administrasaun parlamentár ne’ebé hahú halo diskusaun iha 2021, sei halo revizaun ba kuadru regulamentár kona-ba Organizasaun no Funsionamentu Administrasaun Parlamentár, kona-ba Estatutu Funsionáriu Parlmentu nian no Estatutu Deputadu sira.

Daudaun ne’e prepara hela estratéjia ba dezenvolvimentu rekursu umanu ho reorganiza mapa pesoál no deskrisaun servisu, padraun prosedimentu operasionál, no katálogu ba formasaun.

Nune’e mós, prepara planu estratejíku Parlamentu Nasional nian ba 2023-2027, iha  ámbitu planu asaun ba 2023 sekretariadu PN sei implementa akordu ne’ebé sekretáriu Jerál Parlamentu Nasional Timor-Leste ho Sekretáriu Jerál DPR-RI Indonézia asina iha 23 agostu liubá iha Jakarta-Indonézia kona-ba reforsa Timor-Leste nia servisu protokolu parlamentár no mídia komunikasaun sosiál.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!