iklan

EKONOMIA, HEADLINE

Governu despede tan traballadór 85 bá serbisu iha Koreia Súl

Governu despede tan traballadór 85 bá serbisu iha Koreia Súl

Traballadór Timoroan rona esplikasaun no mensajen hosi Governu molok dezloka bá serbisu iha Korea Súl iha setembru ne’e nia laran, iha salaun Timor Lodge, Comoro, kinta (15/09). Imajen Tatoli/Francisco Sony

DILI, 15 setembru 2022 (TATOLI)—Governu liuhosi Vise Primeiru-Ministru no Ministru Planu no Ordenamentu, José Maria dos Reis, kinta ne’e, despede traballadór 85 ne’ebé iha loron 18 setembru ne’e sei bá serbisu iha Koreia Súl no husu atu hatudu disiplina iha ema-nia rai.

Vise Primeiru-Ministru no Ministru Planu no Ordenamentu, José Maria dos Reis. Imajen Tatoli/Francisco Sony

“Agradese no louva ba determinasaun joven sira ne’ebé kontinua luta ba dezenvolvimentu nasaun hodi determina ho korajen tomak foti desizaun importante tebes bá Koreia Sul, Austrália, Inglatera no Irlándia. Ha’u husu bainhira to’o ema-nia rai tenke hatudu disiplina iha ema-nia sosiedade, pasiénsia apreende esperiénsia ne’ebé barak nune’e filafali mai bele dezenvolve ita-nia rai,” Vise Primeiru-Ministru hateten baihira sai oradór ba serimónia despedida no asina deklarasaun entre traballadór, família no Governu, iha Timor Lodge Comoro.

Aleinde ne’e, governnate ne’e husu traballdór sira hodi serbisu ho disiplina tanba bainhira disiplina maka serbisu hotu sei la’o di’ak no hetan osan hodi hadi’a moris.

“Kooperasaun bilaterál ne’ebé mak ita halo ho Koreia Súl ne’e evidénsia boot ida atu valoriza serbisu traballdór sira iha prosesu dezenvolvimentu nasionál, tanba desde tinan 2009 to’o 2022 Koreia Súl fasilita ona timor-oan hamutuk 4.789 bá serbisu iha Korea Súl,” nia akresenta.

Notísia relevante: Governu desloka tan traballdór 110 bá serbisu iha Koreia Súl

Nia konsidera, inisiativa joven bá serbisu iha rai-li’ur bele kontribui reseita mai Timor-Leste.

“Daudaun ne’e remesa sira ne’ebé maihosi rai-li’ur okupa fatin dahuluk liu ba reseita naun petrolíferu. Ida-ne’e importante tebes katak dezempeñu sira bele fó valór ida ba Timor-Leste liuhosi transferénsia ne’ebé mak sira hetan iha ne’ebá haruka mai famiília sira iha rai-laran,” Ministru nota.

Nune’e, José Reis apela ba traballdór sira hotu atu hatene katak daudaun mina-rai atu maran ona tanba ne’e tenke diversifikasaun ekonómika liuhosi apreende esperiénsia barak iha ema-nia rai, nune’e filafali mai bele aplika.

“Ha’u husu ba Sekretaria Estadu Formasaun Profisionál no Empregu (SEFOPE), ba oin tenke prepara fó apoiu nafatin ba ita-nia trablladór sira ne’ebé filafali mai, nune’e esperiénsia ne’ebé sira hetan bele aplika fali iha Timor-Leste,” nia fó hanoin.

Diretór Nasionál Empregu Exteriór SEFOPE, Filomeno Soares. Imajen Tatoli/Francisco Sony

Iha fatin hanesan, Diretór Nasionál Empregu Exteriór (DNEE), Filomeno Soares, hateten, asina deklarasaun despedida ne’ebé Governu, família no traballadór sira halo ne’e hanesan konkordánsia hosi parte hotu katak aseita atu husik oan sira ba serbisu iha Koreia Súl, nune’e bainhira mosu problema ruma, parte ne’ebé iha ona konkordánsia tenke responsabiliza no rezolve.

“Ha’u husu ba trablladór sira, importante mak ba serbisu iha ema-nia rai ho disiplina no labele sees hosi sistema, nune’e serbisu bele la’o di’ak no bainhira fila mai dezenvolve ita-nia rai,” nia hameno.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!