iklan

EDUKASAUN, HEADLINE

INFORDEPE no UNTL deside ona kalendáriu graduasaun estudante finalista 2.576

INFORDEPE no UNTL deside ona kalendáriu graduasaun estudante finalista 2.576

Prezidente INFORDEPE, Manuel Gomes de Araújo. Imajen Tatoli/Francisco Sony

DILI, 15 setembru 2022 (TATOLI)–Instituto Nacional de Formacão de Docentes e Profissionais da Educação de Timor-Leste (INFORDEPE) hamutuk ho Universidade Nasionál Timor-Lorosa’e (UNTL) deside ona kalendáriu graduasaun ba estudante finalista nível baxarelatu tanba hetan ona despaxu graduasaun hosi Ministru Ensinu Superior Siénsia no Kultura (MESSK).

“Ekipa servisu tékniku INFORDEPE hamutuk ho parte UNTL ajusta ona kalendáriu fiksu graduasaun estudante nível baxarelatu ne’ebé finaliza ona estudu iha UNTL,” Prezidente INFORDEPE, Manuel Gomes de Araújo, hateten iha nini knaar fatin, sesta ne’e.

Kalendáriu fiksu ba graduasaun iha loron 19 setembru 2022 ba etapa dahuluk realiza iha Dili ba estudante 491, kompostu hosi munisípiu Aileu 69, Dili 247, Manatuto 67 no Liquiçá 108.

Notísia relevante: INFORDEPE no UNTL hahú ajusta kalendáriu graduasaun profesór baxarelatu 2.576

Graduasaun ba etapa daruak sei realiza iha munisípiu Baucau iha loron 22 setembru 2022 ba estudante finalista hamutuk 439, kompostu hosi Baucau 249, Lautém 89, no Viqueque 101, graduasaun ba etapa datoluk sei realiza iha munisípiu Ainaro iha loron 27 setembru 2022, ba estudante finalista hosi Ainaro 283, Covalima 180 no Manufahi 198.

Graduasaun etapa dahaat sei realiza iha munisípiu Ermera iha loron 30 setembru 2022, ba estudante finalista hosi munisípiu Ermera 375, graduasaun etapa dalimak sei realiza iha munisípiu Bobonaro iha loron 03 outubru 2022, ba estudante finalista hosi Bobonaro 428 no graduasaun etapa daneen sei realiza iha Oé-cusse iha loron 07 outubru 2022, ba estudante finalista 182.

“Graduasaun baxarelatu ba profesór voluntáriu 2.576 ne’e realiza bazeia ba planu no programa Ministériu Edukasaun Juventude no Desportu, ne’ebé ezije kada profesór ida bainhira atu hanorin tenke iha grau akadémiku mínimu baxarelatu atu ne’e bele iha kapasidade hodi orienta estudante sira bainhira iha sala aula laran,” Prezidente INFORDEPE dehan.

Jornalista   : Tomé Amado

Editora        : Julia Chatarina  

iklan
iklan

Leave a Reply

iklan
error: Content is protected !!