DILI, 05 setembru 2022 (TATOLI)–Instituto Nacional de Formacão de Docentes e Profissionais da Educação de Timor-Leste (INFORDEPE) hamutuk ho Universidade Nasionál Timor-Lorosa’e (UNTL) hahú ajusta ona Kalendáriu atu realiza graduasaun ba profesór baxarelatu hamutuk 2.576 iha sentru neen.
Prezidente INFPRDEPE, Manuel Gomes de Araújo, relata, Ministru Ensinu Superiór Siénsia no Kultura (MESSK), Longuinhos dos Santos, hatún ona despaisu graduasaun no haruka ona ba UNTL iha semana kotuk.
“Ita haruka ona ekipa ida ba halo konfirmasaun hodi ajusta kalendáriu iha sentru neen hodi prepara ba graduasaun,” Prezidente INFORDEPE informa iha ninia knaar fatin, Balide, segunda ne’e.
Notísia relevante: MESSK hahú verifika dokumentu graduasaun INFORDEPE
Tuir nia, ajustamentu kalendáriu graduasaun nian depende ba diskusaun ne’ebé ekipa INFORDEPE halo ho reitoria UNTL tanba desizaun hotu sei foti hosi reitór rasik.
“Kuandu laiha empedimentu ruma ba kalendáriu graduasaun nian parese semana oin bele realiza ona serimónia graduasaun ne’ebé sei hahú hosi Dili,” nia akresenta.
Profesór baxarelatu 2.576 fahe ba sentru neen ho intensaun atu fasilita di’ak liután prosesu graduasaun, ne’ebé graduasaun sei hahú hosi Dili maibé akumula hotu Aileu, Manatuto no Liquiçá ho totál graduadu 491.
“Ita iha dadus graduadu sira hosi munisípiu haat hanesan Dili 247, Aileu 69, Manatuto 67 no Liquiçá 108,” nia tenik.
Aleinde ne’e, Prezidente INFORDEPE konsidera ajustamentu kalendáriu graduasaun ne’e presiza haree posibilidade tempu reitór ninia tanba graduasaun ne’e sei halo tuir sentru sira ne’ebé maka define ona.
“Presiza iha diskusaun di’ak atu define data sira ho didi’ak atu nune’e iha prosesu implementasaun labele mosu fali difikuldade,” nia salienta.
Jornalista : Tomé Amado
Editora : Julia Chatarina
