iklan

HEADLINE, MUNISÍPIU, VIQUEQUE

KONEKTIL kapasita profesór materia relijiaun iha Viqueque

KONEKTIL kapasita profesór materia relijiaun iha Viqueque

Prezidente KONEKTIL, Padre Mateus Afonso. Imajen Ttaoli/Vitorino Lopes da Costa

VIQUEQUE, 15 setembru 2022 (TATOLI)-Komisaun Nasionál Edukasaun Katóliku Timor-Leste (KONEKTIL) fó kapasitasaun kona-ba kurríkulu relijiaun ba manorin hosi eskola privadu no públiku sira iha munisípiu Viqueque.

“Programa formasaun hosi komisaun hodi fó formasaun ba profesór ne’ebé lori matéria relijiaun iha ensinu báziku sira,” Prezidente KONEKTIL, Padre Mateus Afonso, hateten iha salaun edukasaun munisípiu Viqueque, Beloi, kinta ne’e.

Komisaun ne’e ninia programa importante ida maka fó formasaun ba profesór relijiaun sira hosi ensinu báziku siklu 2 iha territóriu Timor-Leste tantu eskola katólika no eskola públiku sira no kontíudu formasaun maka uma-kreda no iha tinan kotuk formasaun kona-ba bíbilia nian.

“Ami la hanorin igreja de’it, ein termu edukasaun liuliu kurríkulu relijiaun nian, hanorin profesór sira hanesan siénsia, entaun tenke prienxe kritériu kurríkulu. Formasaun ne’e ami realiza durante tinan haat ona, katak KONEKTIL nian serbisu hahú tinan 2018 ba formasaun profesór sira hosi ensinu sekundáriu no ensinu báziku sira,” nia akresenta.

Notísia relevante: SEII fó formasaun ba funsionáriu MTK kona-ba igualdade jéneru no inkluzaun

Objetivu formasaun ne’e atu sai matéria relijiaun ida hodi profesór sira hanorin tuir kurríkulu no KONEKTIL propoin ona iha tinan 2019 hodi matéria relijiaun sai matéria ezame nasionál, maibé saidauk tama tanba buat balun hanesan manuál no gia ba profesór.

“Ami hein katak ba oin Ministériu Edukasaun bele konsidera matéria relijiaun sai kurríkulu no sai identidade Timór no sai obrigatóriu ba estudante hotu. Formasaun realiza durante loron-tolu,” nia tenik.

Tuir Responsável komisaun ne’e, formasaun ne’e realiza bazeia ba kapasidade no hetan orsamentu hosi Governu hamutuk $500.000 resin ba formasaun no prepara kurríkulu ba profesór sira,” nia dehan.

Formadór hotu mai hosi KONEKTIL no partisipa hosi profesór sira hosi postu adiministrativu lima hamutuk 88 iha munisípiu Viqueque.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!