iklan

NASIONÁL, HEADLINE, INKLUZAUN SOSIÁL

SEII fó formasaun ba funsionáriu MTK kona-ba igualdade jéneru no inkluzaun

SEII fó formasaun ba funsionáriu MTK kona-ba igualdade jéneru no inkluzaun

Funsionáriu MTK partisipa formasaun igualdade jéneru no inkluzaun hosi SEII, ne’ebé realiza iha salaun MTK, Caicoli, kinta (08/09). Imajen/SEII

DILI, 10 setembru 2022 (TATOLI)—Sekretaria Estadu Igualdade no Inkluzaun (SEII) liuhosi Diresaun Nasionál Jestaun Planu no Estratéjiku fó formasaun ba ajente, funsionáriu no xefia Ministériu Transporte no Komunikasaun (MTK) atu hasa’e koñesimentu no abilidade ba igualdade jéneru no inkluzaun ba implementasaun programa, orsamentu no promosaun iha ministériu.

“Liga ba ita-nia dekretu-lei númeru 38/2012, ne’ebé mak intensaun atu hasa’e kona-ba oinsá rejime ba formasaun no dezenvolvimentu ba funsiunáriu públiku, ida-ne’e importante tebes no mai hosi estratejia Komisaun Funsaun Públika (KFP). Hein katak kooperasaun di’ak entre MTK ho KFP no prezensa hosi Asosiasaun Defisiénsia Timor-Leste (ADTL) nian bele asegura liután programa ne’e,” Diretora Nasionál Jestaun Planu no Estratéjiku hosi SEII, Celeste Ramos Martins Gonçalves, hateten liuhosi nota ne’ebé Agência Tatoli asesu, sábadu ne’e.

Formasaun ne’e realiza durante loron-lima, hahú 08 to’o 12 setembru, ho intensaun atu énfaze ba funsionáriu katak impostante atu asegura no promove igualdade jéneru no inkluzaun iha liña ministériu hotu espesiál ba MTK.

Biban ne’e, Diretora husu ba partisipante sira hotu atubele efetiva partisipasaun, nune’e saida maka presiza, ba oin bele lori duni fó benefísiu atu implementa iha futuru liga ba transporte públiku la’o ho di’ak no susesu.

Notísia relevante: SEII kontinua kapasita feto partisipa vida polítika

Partisipante iha formasaun ne’e hamutuk 30, kompostu hosi feto 18 no mane 12, ne’ebé atividade ne’e fasilita hosi ekipa téknika husi SEII, ADTL no UN Women.

Iha biban hanesan, Ministru Transporte no Komunikasaun, José Agostinho da Silva, hateten, atu harii sosiedade modernu no dezenvolvida, ekonomikamente no sosialmente presiza hatuur iha prinsípiu inkluzaun, toleránsia no igualdade jéneru nia okos.

“Ambisiozu tebes atu konkretiza prinsípiu ida-ne’e, maibé fiar katak ita bele la’o to’o iha ne’ebá ho ajente hotu tantu públiku no privadu, ho servisu no kolabora hamutuk atu konkretiza ita-nia objetivu ne’ebé previstu iha Planu Dezenvolvimentu Estratéjiku Nasionál (PEDN) tinan 2011 to’o 2030,” Ministru hateten.

Tuir governante ne’e, importante tebes atu kontinua servisu tuir nafatin knaar ne’ebé maka hahú ona no haforsa liután kbiit no poder ba sósiu-ekonómiku ba feto no ema ho defisiénsia hanesan kondisaun ida atu harii sosiedade ne’ebé maka modernu no dezenvolvida.

Aleinde ne’e, Timor-Leste fornese asesu ba públika hanesan no justu ba feto, mane, labarik feto, labarik mane inklui ema ho kondisaun defisiénsia, ezemplu asesu ba edukasaun, saúde formasaun profesionál no garante oportunidade hanesan iha kampu servisu, vida sosiál, kulturál no polítika atubele kontribui ba dezenvolvimentu nasionál hodi bele implementa PEDN tinan 2011-2030, ho objetivu dezenvolvimentu sustentável no programa VIII Governu Konstitusionál iha tinan 2018 to’o 2023.

Governante ne’e garante nafatin kona-ba polítika implementasaun abordajem integradu jéneru sei efikásia liután iha lei, polítika, programa no orsamentu Estadu tomak ne’ebé aborda liuhosi instituisaun Estadu hodi garante implementasaun ba asuntu igualdade no inkluzaun iha nasionál to’o munisípiu inklui Rejiaun Administrativa Espesiál Oé-cusse Ambeno (RAEOA).

“Ho polítika jéneru maka feto sira bele iha direitu no obrigasaun mesak ho mane no hamutuk ho ema ho defisiénsia bele asesu ba asesibilidade hanesan transporte liuhosi tasi, rai leten, lalehan no komunikasaun. Fó mós prioridade ba direitu feto sira atubele hetan asesu hanesan ho mane hodi foti desizaun no kontinua promove asaun kona-ba formasaun profisionál iha área oinoin,” nia dehan.

Jornalista   : Osória Marques

Editora        : Julia Chatarina

iklan
iklan

Leave a Reply

iklan
error: Content is protected !!