DILI, 23 agostu 2022 (TATOLI)–Governu liuhosi Sekretaria Estadu Igualdade no Inkluzaun (SEII) kontinua fó kapasitasaun ba feto partisipa vida polítika, liu-liu partisipa iha eleisaun xefe suku.
“Tanba ne’e, papél SEII iha objetivu apasita feto sira atu foti desizaun iha nível suku, entaun ami mós sei apoia orsamentu ba sosiedade sivil sira atu ajuda mós SEII atu fó formasaun ba preparasaun feto sira atubele partisipa iha eleisaun, la’ós atu tenke manan maibé oinsá atu motiva sira atubele partisipa mós iha eleisaun iha xefe suku sira,” Sekretária Estadu Igualdade no Inkluzaun, Maria do Rosário Fátima Correia, hateten hafoin relata serbisu ba Primeiru-Ministru, Taur Matan Ruak, iha Rezidénsia Farol, tersa ne’e.
Notísia relevante: SEII fasilita formasaun “Proteje igualdade jéneru-inkluzaun sosiál” ba kargu xefia CLN
Sei realiza eleisaun eleisaun parlamentár no eleisaun suku iha tinan 2023, ne’ebé iha eleisaun parlamentár ne’e 30% hosi partisipasaun feto nian, ne’ebé SEII laiha dúvida ona atu halo advokasia, tanba instituisaun Estadu ne’e ninia papél mós atu halo advokasia.
Aleinde ne’e, sei iha eleisaun suku ne’ebé iha suku 400 resin maibé iha tinan-hitu nia laran 5% de’it maka feto sai hanesan xefe suku no 4% mak xefe aldeia.
SEII mós apoia orsamentu $300.000 ba feto hodi halo negósiu, orsamentu ne’e hosi OJE transferénsia públiku ho ninia rotativa ba iha grupu benefisiáriu. Iha grupu benefisiáriu hamutuk 351 iha munisípiu 12 no RAEOA.
Biban hanesan, SEII mós relata serbisu ba Xefe Governu ligadu ho revizaun datoluk ba planu asaun nasionál violasaun bazeia ba jéneru.
“Ita hotu hatene katak hosi lei númeru 7/2010 kona-ba violénsia doméstika ne’ebé mak vigora no implementa iha tinan 2010. Ita hamosu estratéjia ba iha planu asaun nasionál violénsia bazeia ba jéneru ne’e halo revizaun ba datoluk ona,” nia tenik.
SEII iha pilár tolu hanesan prevensaun, servisu sosiál, no asesu ba justisa.
“Ita iha mós monitorizasaun no avaliasaun, ne’ebé sei aliña ba iha pilar tolu ne’e. Iha lei ne’e hateten katak iha liña ministeriál sira mós oinsá tau sira-nia orsamentu kada tinan ba iha asuntu igualdade no jéneru, tantu liña ministeriál, órgaun autonomu no munisipál,” nia salienta.
Jornalista : Antónia Gusmão
Editora : Julia Chatarina
