DILI, 11 agostu 2022 (TATOLI)—Diretór Jerál Sekretáriu Estadu Igualdade Inkluzaun (SEII), Armando da Costa, hateten SEII hamutuk ho Asosiasaun Defisiénsia Timor-Leste (ADTL) fó formasaun kona-ba “Igualdade jéneru no Inkluzaun sosiál ba kargu xefia Sentru Lojístika Nasionál (CLN-sigla portugés).
“Ami-nia apresiasaun no kongratula ba kolega sira hosi CLN ne’ebé ohin ita konsege realiza formasaun ida-ne’e ho asuntu espesífiku hodi ko’alia kona-ba igualdade no inkluzaun iha instituisaun CLN. Ida-ne’e, hodi haree oinsá iha ita-nia atendimentu no fornesimentu públiku ne’ebé ita fornese pelumenus iha sensibilidade no responde ba asuntu igualdade no inkluzaun ninian,” nia hateten liuhosi komunikadu imprensa ne’ebé Agência Tatoli asesu, kinta ne’e.
Programa ida-ne’e SEII konsidera hanesan parte ida-ne’ebé CLN hola parte hosi polítika Estadu ba implementasaun abordajen integrada jéneru.
SEII nia polítika no programa orsamentu no atividade Estadu nian no ida ne’e di’ak tebes hodi haree ba iha CLN, maske ne’e ba dahuluk maibé nunka tarde maibé SEII nafatin iha oportunidade atu bele dezenvolve.
Diretur Ezekutivu Asosiasaun Defisiénsia Timor-Leste (ADTL), Cesário da Silva, hateten ADTL hakarak hato’o apresiasaun mós ba CLN ne’ebé mak bele envolve ona ADTL hodi hola parte iha formasaun ida-ne’e.
ADTL hamutuk nafatin ho SEII hodi fasilita formasaun hanesan ne’e ba instituisaun Estadu hotu-hotu atu bele integra asuntu ne’e iha programa kada instituisaun nian.
“Ha’u hanoin situasaun ida-ne’e momentu ida-ne’ebé furak atu ita bele integra asuntu ne’e, tanba ita haree hosi sidadaun dala barak ita ko’alia dehan sidadaun hotu hanesan iha lei nia okos maibé iha aplikasaun sidadaun balun ita husik hela. Situasaun sira hanesan ne’e mak ita hakarak asegura ba oin saida mak ita hakarak halo hamutuk atu asegura Timor-Leste tenke hanoin duni ema hotu hanesan iha dezenvolvimentu nia oin. Ita la husik ema ida iha kotuk, ita tenke mai ho asaun no asaun ne’e mak ita tenke integra iha ita-nia programa sira,” Cesário dehan.
Formasaun ne’e hala’o durante loron ida no partisipante hamutuk ema na’in-30 ne’ebé kompostu hosi feto na’in-15 no mane na’in-15 ne’ebé mai hosi kargu diretór sira, kargu xefia no funsiunáriu hosi CLN no formasaun ne’e fasilita hosi ekipa tékniku hosi SEII no ADTL.
Jornalista : Osória Marques
Editór : Cancio Ximenes
