iklan

EDUKASAUN, HEADLINE

MEJD identifika karteira eskolár iha Ainaro no Manufahi sufisiente

MEJD identifika karteira eskolár iha Ainaro no Manufahi sufisiente

Ilustrasaun karteira eskolár. Imajen/Espesiál

DILI, 15 setembru 2022 (TATOLI)–Ministériu Edukasaun Juventude no Desportu (MEJD) konsidera munisípiu Ainaro no Manufahi iha ona karteira eskolár sufisiente, nune’e bele asegura hela iha armazen.

“Tanba ne’e, ministériu la presiza halo tan distribuisaun karteira eskolár foun ba munisípiu rua ne’e. Ami halo ona verifikasaun katak eskola sira ne’ebé iha karteira eskolár sufisiente, maski sira bele hatama proposta mai mós ami sei la atende,” Diretór Jerál Administrasaun no Finansa hosi MEJD, Antoninho Pires, informa iha ninia knaar fatin, MEJD, Vila Verde, kinta ne’e.

Kestaun hanesan ne’e akontese iha munisípiu Ainaro no Manufahi, ne’ebé karteira eskolár barak mak asegura hela iha armazen maibé sira halo polítika hodi hatama proposta husu apoiu.

Notísia relevante: Diretór ESJ Finantil garante karteira eskolár sufisiente ba estudante partisipa ezame

Tuir Diretór, ministériu iha ninia polítika rasik bainhira halo distribuisaun karteira eskolár foun ba munisípiu rua ne’e tenke rekolla fali karteira eskolár tuan ne’ebé iha, nune’e ministériu bele distribui filafali ba eskola sira seluk ne’ebé seidauk hetan karteira eskolár.

“Maneira sira ne’e mosu bainhira ministériu hahú fahe ona karteira eskolár 20.000 ba eskola sira ne’ebé maka presiza duni atu aumenta, tanba ministériu iha ona lista eskola sira nune’e bainhira fahe tiha mak sei haree eskola ne’ebé presiza tan foin ba prodús tan,” nia akresenta.

Aleinde ne’e, dadus hosi MEJD fó sai katak produsaun karteira eskolár ba dahuluk iha tinan 2016 to’o 2017 ho kuantidade 100.000, ne’ebé konsege distribui ona ba eskola sira iha territóriu nasionál maibé la sufisiente.

Iha tinan 2020-2021, MEJD kontinua prodús tan karteira eskolár hamutuk 20.000 ne’ebé oras ne’e daudaun hahú distribui ona ba eskola sira iha territóriu nasionál no dadus eskola ne’ebé hetan ona karteira eskolár maka munisípiu Dili iha eskola hamutuk 16.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!