iklan

HEADLINE, MUNISÍPIU, VIQUEQUE

SEII inaugura edifísiu VPU iha Viqueque

SEII inaugura edifísiu VPU iha Viqueque

Serimónia inaugura edifísiu VPU iha Komandu PNTL munisípiu Viqueque, kinta (15/09). Imajen Tatoli/Vitorino Lopes da Costa

VIQUEQUE, 15 setembru 2022 (TATOLI)–Sekretária Estadu Igualdade no Inkluzaun (SEII), Maria do Rósario Fatima Correia, kinta ne’e, inaugura edifísiu ba Polísia Nasionál Timor Leste (PNTL) hosi Unidade Pesoál Vulnerável (VPU) iha munisípiu Viqueque.

“Ha’u agradese ba Uniaun Europeia ne’ebé  fó ona apoiu fundu ba ita hodi harii edifísiu ba ema vulnerável sira tantu feto, labarik no ema ho defisiente sira. Hosi uma ida-ne’e sei fó atendimentu ba ita,” Sekretária Estadu Igualdade no Inkluzaun hateten iha Komandu PNTL munisípiu Viqueque, kinta ne’e.

Governante ne’e konsidera edifísiu ne’e dignu, tanba ne’e espera bele fó atendimentu dignu ba vítima violénsia seksuál,  abusu seksuál, no violénsia doméstika, ne’ebé akontese iha Timor-Leste.

“Kazu viólensia doméstika kada tinan númeru sempre a’as. Ita espera katak iha munisípiu Viqueque bele redús. Hosi uma ida-ne’e ita bele halo prevensaun kazu violénsia,” nia akresenta.

Notísia relevante: SEII fó formasaun ba funsionáriu MTK kona-ba igualdade jéneru no inkluzaun

Iha fatin hanesan, Reprezentante Vise-Ministru Interiór (MI) no atuál Komadante Administrasaun PNTL, José Maria Neto, agradese ba Programa Nasaun Unida ba Dezenvolvimentu (UNDP, sigla inglés) no Uniaun Europeia iha Timor-Leste ne’ebé kolabora ho PNTL hodi harii edifísiu ba VPU, ne’ebé antes ne’e halo iha Maliana no agora iha munisípiu Viqueque.

“Konstrusaun edifísiu VPU ho durasaun fulan-neen konsege finaliza ho kualidade  di’ak. Uma ida-ne’e hanesan onra ida tanba tinan-20 nian laran laiha edifísiu iha Viqueque no uza de’it fatin veteranu maibé ohin loron parseiru sira fó ona apoiu ba ita hodi fó atendimentu ba vítima sira,” nia tenik.

Nune’e, nia husu ba membru sira atu kuidadu no asegura edifísiu ne’e hodi fó atendimentu di’ak ba vítima viólensia ne’ebé rejista iha munisípiu Viqueque.

Tuir dadus ne’ebé rejista iha VPU nasionál, iha territóriu Timor-Leste hahú hosi fulan-janeiru to’o agostu rejista kazu viólensia doméstika totál hamutuk 749 no kazu violasaun seksuál hamutuk 149.

Edifísiu ne’e harii hosi empreza Ribio Unip, Lda, ho medida metru 11,5×12, ho kustu $65.700, ne’ebé hahú konstrusaun iha novembru 2021 no finaliza iha jullu 2022.

Serimónia inaugurasaun ne’e partisipa hosi reprezentante UNDP, Uniaun Europeia, Sekretáriu munisípiu Viqueque, Komandante PNTL munisípiu Viqueque, Komandante Eskuadra postu lima, Autoridade lokál no Diretór liña ministeriál sira iha munisípiu Viqueque.

 Jornalista   : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!